Դրուզ համայնքը Սիրիայում գերիների փոխանակում է առաջարկում

Սիրիայի Աս-Սուվեյդա նահանգի դրուզ համայնքի ղեկավարությունը հայտարարել է արաբական ցեղերի հետ գերիների փոխանակման գործողություն սկսելու պատրաստակամության մասին։

Ինչպես հաղորդում է Sham TV-ն, շեյխերը համապատասխան հայտարարությունն արել են երկրի հարավում վերջերս տեղի ունեցած բախումների ֆոնին։

Հայտարարության համաձայն, գերի վերցված զինյալների և պատանդների ազատ արձակումը նախատեսված է տեղական ժամանակով ժամը 18:00-ին Ումմ Զեյթուն շրջանում։ Համայնքի ներկայացուցիչները կոչ են արել կողմերին համագործակցել և պատասխանատու լինել՝ ընդգծելով, որ հույս ունեն բոլոր առևանգված տղամարդկանց, կանանց և երեխաների անվտանգ վերադարձնել։

Հայտարարությամբ նաև կոչ է արվում իշխանություններին անհապաղ վերականգնել տարածաշրջանում բջջային կապը և ինտերնետը։ Շեյխերի խոսքով՝ կապի միջոցներին հասանելիությունը անհրաժեշտ է միջազգային կառույցների միջնորդությամբ մշակված համաձայնագրի արդյունավետ իրականացման, ինչպես նաև բնակչության հետ արագ կապի համար։

Սիրիական բեդվին ցեղերի և Դամասկոսի իշխանությունների կողմնակիցների հետ կապված ալիքները հաղորդում են, որ Սիրիայի անվտանգության ուժերը նախազգուշական կրակոցներ են արձակում Աս-Սուվեյդա տարածքում բեդվին ցեղերի զինված ներկայացուցիչների վրա։

Նշվում է, որ բեդվինները դժգոհություն են հայտնում և մեղադրում Դամասկոսին դավաճանության մեջ։

Այս ֆոնին հաղորդվում է, որ Իսրայելը հարվածում է Աս-Սուվեյդային։

Իսրայելական Telegram ալիքները, սակայն, պնդում են, որ Աս-Սուվեյդայի մոտակայքում գտնվող Ալ-Արիկա քաղաքում բեդվինների և դրուզների միջև բախումներ են տեղի ունենում, ինչպես նաև՝ դրուզների առևանգում։
Պետք է նշել, որ դրուզներին հաջողվել է լիովին վերականգնել Սիրիայի հարավում գտնվող Աս-Սուվեյդա քաղաքի վերահսկողությունը, որտեղ նրանց և բեդվինների միջև մարտերը շարունակվել են մի քանի օր անընդմեջ։ Այս մասին շաբաթ օրը՝ հուլիսի 19-ին, հայտնել է Մեծ Բրիտանիայում գտնվող Մարդու իրավունքների սիրիական դիտարանը (SOHR): Նրա խոսքով՝ բեդվին զինյալները շաբաթ երեկոյան նահանջել են Աս-Սուվեյդայից դրուզների լայնածավալ հարձակումից հետո։