ԵՄ-ն առաջին անգամ պատժամիջոցներ է սահմանում չինական բանկերի նկատմամբ՝ Ռուսաստանի հետ համագործակցության համար

Եվրոմիությունը չինական երկու բանկեր ներառել է ռուսական ռազմական մեքենայի զսպմանն ուղղված պատժամիջոցների 18-րդ փուլում: Սա առաջին դեպքն է, երբ Չինաստանի ֆինանսական հաստատությունները պատժամիջոցների են ենթարկվում ԵՄ-ի կողմից՝ Ուկրաինայի դեմ Մոսկվայի ագրեսիային օգնելու համար: Դիվանագիտական աղբյուրների փոխանցմամբ՝ սահմանափակող միջոցներ են կիրառվել «Suifenhe Rural Commercial» և «Heihe Rural Commercial» տարածաշրջանային բանկերի նկատմամբ:

Պեկինին չի հաջողվել հասնել բանկերի՝ ցուցակից հեռացմանը։ Եվրոպական հանձնաժողովն արդեն տեղեկացրել է ԵՄ դեսպաններին, որ ցուցակը կվերանայվի վեց ամսից: Եթե կազմակերպությունները ապացուցեն, որ դադարեցրել են Ռուսաստանի պաշտպանական ոլորտին օգնելը, դրանք կարող են հանվել պատժամիջոցների ցանկից։

«Ֆայնենշլ Թայմս»-ը նախկինում հաղորդել էր, որ տվյալ բանկերը կրիպտոարժույթային գործարքներ են օգտագործել ԵՄ գործող պատժամիջոցները շրջանցելու համար՝ հեշտացնելով պատժամիջոցների տակ գտնվող ապրանքների ներմուծումը ՌԴ։