«Իրանի դեմ պատերազմը կվերսկսվի, եթե նա վերադառնա միջուկային ծրագրին»․ ՌԴ-ում Իսրայելի դեսպան

Իսրայելը կարող է վերսկսել ռազմական գործողություններն Իրանի դեմ, եթե տեսնի Իսլամական Հանրապետության կողմից իր միջուկային ծրագրին վերադառնալու փորձեր, ճեպազրույցի ժամանակ հայտարարել է Մոսկվայում հրեական պետության դեսպան Սիմոնա Գալպերինը, հաղորդում է RBC-ի թղթակիցը։

«Մենք ավարտեցինք գործողությունն Իրանում այն փաստով, որ Իրանը չի ունենա միջուկային ռազմական ներուժ։ Եվ մենք թույլ չենք տա վերսկսել միջուկային ռազմական ծրագիրը և բալիստիկ հրթիռներ ստեղծելու լայնածավալ ծրագիրը, քանի որ գործողության նպատակն էր վերացնել անմիջական սպառնալիքն ու Իրանի՝ Իսրայելի համար գոյության սպառնալիք ներկայացնելու կարողությունը», - ասել է Գալպերինը։

Դիվանագետը, սակայն, նշել է, որ առայժմ ռազմական գործողությունները վերսկսելու հեռանկարը մշուշոտ է։