Telegram-ը ներկայացուցչություն կբացի Ռուսաստանում

Telegram մեսենջերն սկսել է գրանցել իր ներկայացուցչությունը Ռուսաստանում այսպես կոչված «վայրէջքի» օրենքի համաձայն, ինչի մասին վկայում է Ռոսկոմնադզորի համապատասխան գրանցամատյանում կատարված գրառումը:

Ներկայում Բրիտանական Վիրջինյան կղզիներում գրանցված Telegram Messenger, Inc. ընկերությունը էլեկտրոնային ձևաթուղթ է տեղադրել տեղեկատվական ռեսուրսում և գրանցվել է Ռոսկոմնադզորի պաշտոնական կայքում գտնվող անձնական հաշվում: «Մասնաճյուղի ստեղծումը, ներկայացուցչության բացումը կամ ռուսական իրավաբանական անձի հիմնադրումը» գտնվում է հաստատման փուլում:

«Ինտերնետ տեղեկատվական և հեռահաղորդակցական ցանցում օտարերկրյա անձանց գործունեության մասին» օրենքը, որը նաև կոչվում է «վայրէջքի» օրենք, ուժի մեջ է մտել 2022 թվականի հունվարի 1-ին։ Այն պարտավորեցնում է արտասահմանյան ՏՏ ընկերություններին, որոնք ունեն օրական ավելի քան 500 հազար օգտատեր, ներկայացուցչություն բացել Ռուսաստանում և գրանցվել անձնական հաշվում Ռոսկոմնադզորի համապատասխան ռեսուրսում, տրամադրելով հետադարձ կապի ձևաթուղթ։ Օրենքի չպահպանումը արգելում է գովազդը, վճարումներ ընդունելը Ռուսաստանի քաղաքացիներից և ընկերություններից, ինչպես նաև սպառնում է արգելափակել ռեսուրսը Ռուսաստանում։