Իսրայելը հարվածել է Դամասկոսի նախագահական պալատին ու գլխավոր շտաբին

Իսրայելական աղբյուրները հայտնում են, որ Իսրայելի ռազմաօդային ուժերը հարվածել են Դամասկոսի նախագահական պալատին։ Միաժամանակ Իսրայելի պաշտպանության ուժերը հարվածել են Սիրիայի գլխավոր շտաբի ռազմական համալիրին, որը նույնպես գտնվում է երկրի մայրաքաղաքում։
Իսրայելի պաշտպանության բանակի ռադիոն հաղորդում է, որ սիրիական ուղղությամբ իրավիճակի սրման համատեքստում Իսրայելը պատրաստվում է երկու դիվիզիա տեղափոխել Գոլանի բարձունքներ։ Բանակն սպասում է մի քանի օր տևող լարված մարտերի։ Իսրայելի պաշտպանության շտաբի պետը հրաման է տվել մեծ ավիախումբ ուղարկել սիրիական սահման։

Սիրիական պետական հեռուստատեսության տվյալներով՝ հրետակոծության հետևանքով վիրավորվել է առնվազն երկու մարդ։ Իսրայելի վարչապետ Բենիամին Նեթանյահուն հայտարարել է, որ երկրի բոլոր ուժերը ներգրավված են Սիրիայի դեմ գործողություններում։ Նա նշել է, որ Սիրիայի հարավ-արևմուտքում գտնվող Սուվեյդա նահանգում իրավիճակը շարունակում է մնալ ծայրահեղ ծանր։
Դիմելով Իսրայելի դրուզ քաղաքացիներին, ովքեր ցանկանում են հատել սահմանը և օգնել իրենց սիրիացի հայրենակիցներին, Նեթանյահուն զգուշացրել է. «Դուք ձեր կյանքը վտանգի եք ենթարկում։ Ձեզ կարող են սպանել, կարող են առևանգել։ Այսպես անելով՝ դուք խոչընդոտում եք Իսրայելի պաշտպանության բանակի գործողություններին։ Ես խնդրում եմ ձեզ վերադառնալ տուն և թույլ տալ, որ բանակը կատարի իր աշխատանքը»,- ընդգծել է վարչապետը։