ՌԴ Լենինգրադի մարզում ձերբակալվել է 4 ադրբեջանցի ձեռնարկատեր

Ռուսաստանում շարունակվում են ադրբեջանական սփյուռքի կազմակերպությունների հետ կապված ադրբեջանցի գործարարների ձերբակալությունները: Այս անգամ Լենինգրադի մարզում ձերբակալվել է 4 ադրբեջանցի ձեռնարկատեր՝ տեղի ոստիկանության ղեկավարությանը կաշառելու մեղադրանքով։

Ինչպես հաղորդում են ռուսական լրատվամիջոցները, գործողությունն սկսվել է Լենինգրադի մարզի Վսևոլոժսկի շրջանի 128-րդ ոստիկանական բաժանմունքի պետ, փոխգնդապետ Սերգեյ Կորոտկովի ձերբակալությամբ: Անցյալ շաբաթ նա ձերբակալվել էր ԱԴԾ հատուկ նշանակության ուժերի կողմից։

Ռուսաստանի քննչական կոմիտեի տվյալներով՝ ոստիկանապետը մեղադրվում է առնվազն 3,7 միլիոն ռուբլի կաշառք ստանալու մեջ՝ «նրանց անօրինական ձեռնարկատիրական գործունեությունը թույլատրելու դիմաց»: Ձերբակալվել են նաև նույն շրջանի 87-րդ ոստիկանական բաժանմունքի պետ, գնդապետ Ռոման Կամերզանովը և 97-րդ ոստիկանական բաժանմունքի պետ Ալեքսեյ Պերեմիբեդան: