«ԱՄՆ-ն հիասթափված է Ուկրաինայի հարցում առաջընթացի բացակայությունից». Ռուբիո

Միացյալ Նահանգները հետաքրքրված է Ուկրաինայում հակամարտությանը վերջ դնելու հստակ ծրագրով, և այս հարցի վերաբերյալ առաջարկները Թրամփին կներկայացվեն հինգշաբթի։ Այս մասին հայտնել է ԱՄՆ պետքարտուղար Մարկո Ռուբիոն՝ Մալազիայում ՌԴ ԱԳ նախարար Սերգեյ Լավրովի հետ հանդիպման ավարտին։

Ռուբիոն հայտնել է, որ Լավրովի հետ քննարկել է «որոշ գաղափարներ» այն մասին, թե ինչպիսին կարող է լինել ուկրաինական հակամարտությանը վերջ դնելու «ճանապարհային քարտեզը»։

«Միացյալ Նահանգները հիասթափված է Ուկրաինայի հարցում շոշափելի առաջընթացի բացակայությունից», - ասել է Ռուբիոն՝ հավելելով, որ ԱՄՆ-ն կշարունակի համագործակցել բոլոր կողմերի հետ՝ Ուկրաինայում հակամարտությունը լուծելու համար, չնայած խաղաղության բանակցություններում «առաջընթացի բացակայությանը»։

Նրա խոսքով՝ այսօր Ռուսաստանի ներկայացուցիչների հետ հանդիպման ժամանակ Միացյալ Նահանգները լսել է Ուկրաինայի վերաբերյալ առաջարկներ, որոնք նախկինում չէին հնչեցվել։