«Իսրայելը և Համասը մոտ են համաձայնության». Նեթանյահու

Պաղեստինյան ՀԱՄԱՍ-ը և Իսրայելի կառավարությունը մոտենում են Գազայի հատվածում հրադադարի և անկլավում պահվող պատանդների ազատ արձակման վերաբերյալ համաձայնության հասնելուն, հայտարարել է Իսրայելի վարչապետ Բենիամին Նեթանյահուն։
«Կարծում եմ՝ մենք մոտենում ենք համաձայնության, կարծում եմ՝ կա այն կնքելու լավ հնարավորություն»,- ասել է նա՝ պատասխանելով Fox Business-ին տված հարցազրույցում այդ մասին հնչած հարցին։

Հուլիսի 6-ին ՀԱՄԱՍ-ը և Իսրայելը՝ Եգիպտոսի, Կատարի և Միացյալ Նահանգների միջնորդությամբ, Դոհայում վերսկսեցին բանակցային գործընթացը, որի նպատակն է Գազայի հատվածում հրադադարի և անկլավում պահվող իսրայելցի պատանդների ազատ արձակման վերաբերյալ համաձայնության հասնելը։ Ինչպես երկուշաբթի օրը «Ալ Արաբիա» հեռուստաալիքին հայտնել են աղբյուրները, խորհրդակցություններն ընթանում են դրական մթնոլորտում, բայց դեռևս առաջընթաց չկա։ Reuters-ի փոխանցմամբ՝ Իսրայելի կողմից Գազայի հատված մարդասիրական օգնության անարգել և անվտանգ մուտք ապահովելուց հրաժարվելը բանակցությունների հիմնական խնդրահարույց հարցն է։