«Ներոնյան ժպիտով» բավարարվածություն է ապրում՝ ներքաղաքական կայունության հաշվին»․ Արմեն Հովասափյան

ՀՀԿ խորհրդի անդամ Արմեն Հովասափյանի ֆեյսբուքյան գրառումը․ «Այսօր խորհրդարանում տեղի ունեցած խայտառակությունը, վաղ առավոտից ՀԷՑ-ում իրականացված «խուզարկությունները», ընդդիմադիր պատգամավորներին անձեռնմխելիությունից զրկեը ու նրանց կալանքի տանելու գործընթացի նախաձեռնումը՝ բոլորը նույն տեխնոլոգիայի շրջանակում են։ Նպատակը մեկն է՝ հնարավորինս սրել առանց այն էլ գերզգայուն և շիկացած ներքաղաքական դիսկուրսը՝ հասարակության ներսում առաջացնելով աղմուկ, անկայունություն և արհեստական ցնցումներ։
Սա համակարգային մանիպուլյացիայի դասական օրինակ է, որի գլխավոր շահառուն կրկին Նիկոլն է։ Ըստ ամենայնի՝ այս ամենը միտումնավոր հաշվարկված քայլ էր՝ Մայր Աթոռ Սուրբ Էջմիածնի վրա պատրաստվող գրոհը որոշակի ինֆորմացիոն քողի տակ լղոզելու նպատակով։
Հիշում եք՝ նախորդ անգամ էլ նույն ձեռագիրը գործի էր դրված. մամուլում հայտնվում է զգայուն տեղեկատվություն՝ Վեհարանի դեմ ակնկալվող գործողությունների մասին, այդ օրը ոչ մի բան, հաջորդ օրն, արդեն, ոստիկանական հատուկջոկատայինները Վեհարանի պատերի վրայով մագլցեցին ներս։ Այսօր նույնպես նույն ձեռագիրն է՝ նույն ռեժիսորով։
Նիկոլն, ինչպես բազմիցս ասել ենք, տեսարանների մարդ է։ Նա քաղաքականությունն ընկալում է որպես դրամատիկական շոու, որտեղ ինքը միշտ գլխավոր դերում է՝ «խաղաղարարի», «թափանցիկի», կամ էլ «հայոց Ներոնի» կերպարով։ Եվ հենց այդ «ներոնյան ժպիտով» է նա իր անձնական բավարարվածությունն ապրում՝ ներքաղաքական կայունության հաշվին»։