«Վաշինգթոնն ավելի շատ զենք կուղարկի Կիևին»․ Թրամփ

Վաշինգթոնը Կիևին ավելի շատ զենք կուղարկի՝ հիմնականում պաշտպանական, Associated Press-ի փոխանցմամբ, հայտարարել է ԱՄՆ նախագահ Դոնալդ Թրամփը՝ Իսրայելի վարչապետ Բենիամին Նեթանյահուի հետ միջոցառման ժամանակ։

«Մենք ավելի շատ զենք ենք ուղարկելու։ Նրանք պետք է կարողանան պաշտպանվել։ Նրանք հիմա շատ հարվածներ են ստանում»,- ասել է ԱՄՆ նախագահը։

Wall Street Journal-ի տվյալներով՝ Թրամփը Վլադիմիր Զելենսկուն խոստացել է, որ Կիևին կուղարկի այնքան ռազմական օգնություն, որքան կարող է։

«Նախագահ Թրամփի հանձնարարությամբ Պաշտպանության նախարարությունն Ուկրաինա է ուղարկում լրացուցիչ պաշտպանական զենք, որպեսզի ուկրաինացիները կարողանան պաշտպանվել, մինչ մենք աշխատում ենք երկարատև խաղաղություն ապահովելու և սպանություններին վերջ տալու ուղղությամբ»,- ասել է Փենթագոնի խոսնակ Շոն Փարնելը։