«Հիմա էլ ուշ չէ, եթե համակարգը ղեկավարվի ուժեղ Գլխավոր հրամանատարի կողմից»․ Վահրամ Մարտիրոսյան

Գործարար Վահրամ Մարտիրոսյանի ֆեյսբուքյան գրառումը. «Ֆիքսենք պատերազմի մասին 2 կարևոր իրողություններ.
1. Ջրականի գումարտակներն ավելի քիչ զոհեր են ունեցել հենց Ջաբրաիլի ճակատամարտի ընթացքում (սեպտեմբերի 27 - հոկտեմբերի 3), քան դրանից հետո։ Քանի դեռ ՀՀ զինված ուժերն գործել են որպես բանակ՝ այսինքն՝ որպես համակարգ, թշնամին ջախջախվել է և չի կարողացել առաջ շարժվել։ Իսկ մեր կորուստները եղել են անգամներով ավելի քիչ։
2. Տեսանյութում նկարագրված փաստերը՝ հոկտեմբերի 2-ից գումարտակի հրամանատար չունենալը, դիպուկահարի և տեղաբաշխման պատմությունները, ևս մեկ անգամ վկայում են, որ բանակի ուղղահայացը այլևս չի գործել։ Զորքը տրամադրվել է ինքն իրեն, ու գործել է ջոկատի տրամաբանությամբ։ Ու դրանից էլ սկսվել են մեր ահռելի կորուստները ու ընդհանուր պարտությունը։
Եվ 2 կարևոր հետևություններ.
1. Եթե նոյեմբերի 9-ին փոխվեր գլխավոր հրամանատարը, և նոր հրամանատարը իրականացներ ընդամենը 2 գործողություն՝ հրամանով վերականգներ բանակի դադարեցված համալրումը, և վերականգներ բանակի կառավարման ուղղահայացը, ապա թշնամուն առնվազն կանգնեցնելու էինք։
2. Հիմա էլ ուշ չէ։
Եթե մեր բանակում իրականացնենք հետևյալ բարեփոխումները՝
- Զորահրամանատարներ նշանակվեն տեսակով դիվերգենտ զինվորականներին։
- Ներդրվի զորքերի ժամանակակից կառավարման համակարգ։
- Բարձրացվի տեխնոլոգիական մակարդակը։
- Զորքերի թվաքանակը ավելացվի առնվազն 50%-ով։
- Ստեղծվեն էշելոնացված ֆորտիֆիկացիոն համակարգեր։
- Ստեղծվեն կանոնավոր բանակի համալրման մոբիլիզացիոն, էշելոնացված պահեստազորային համակարգեր։
- Եվ ամենակարևորը՝ այս ամբողջ համակարգը ղեկավարվի ուժեղ, կամային և կոմպետենտ Գլխավոր հրամանատարի կողմից»։
Ադրբեջանը մեր դեմ ոչ մի շանս չունի!