Թրամփի որդին հավանական է համարել, որ ինքը կամ ընտանիքի որևէ այլ անդամ կարող են քաղաքական դինաստիա ստեղծել

ԱՄՆ-ի նախագահ Դոնալդ Թրամփի որդին՝ Էրիկը, հավանական է համարել, որ ինքը կամ ընտանիքի որևէ այլ անդամ կարող են քաղաքական դինաստիա ստեղծել։

Թրամփ կրտսերը, որն այժմ «Թրամփի կազմակերպության» համագործակից փոխնախագահն է, այս մասին ասել է Financial Times-ին տված հարցազրույցում։
Ըստ Էրիկ Թրամփի՝ իր տեսած քաղաքական գործիչների կեսն իր վրա բացարձակ տպավորություն չի թողնում և ինքը կարող էր շատ ավելի լավ աշխատանք կատարել։ «Ժամանակը ցույց կտա։ Բայց ինձնից բացի ուրիշներ էլ կան»,- ասել է նա։ Միևնույն ժամանակ, գործարարը խոստովանել է, որ վստահ չէ, թե արդյոք ցանկանում է նման պաշտոն ստանալ և «իր սիրելիներին ենթարկել այս համակարգի դաժանությանը»։

«Կցանկանայի՞, որ իմ երեխաներն ունենան նույն փորձը, ինչ ես ունեցել եմ վերջին 10 տարիների ընթացքում։ Գիտեք, եթե պատասխանը «այո» լիներ, կարծում եմ՝ քաղաքականությունը հեշտ կլիներ այն իմաստով, որ ես կարող էի դա անել։ Եվ, ի դեպ, կարծում եմ՝ մեր ընտանիքի մյուս անդամներն էլ կարող էին դա անել»,- ասել է նա։

41-ամյա Էրիկը նախագահի երրորդ որդին է և երկար տարիներ ներգրավված է եղել Թրամփի բիզնեսում։ Նա ընդգծել է, որ հայրն այժմ չի մասնակցում ընկերության գործերին, նա կենտրոնացած է «Երրորդ համաշխարհային պատերազմի կանխարգելման» վրա։ Բիզնեսը կարող էր ավելի հաջողակ լինել, իսկ Թրամփերի կարողությունը կարող էր ավելի շատ զրոներ ունենալ, եթե ընտանիքի ղեկավարը չառաջադրվեր նախագահի պաշտոնում, կարծում է Թրամփ կրտսերը։

Ամերիկացի նախագահն ունի ևս չորս երեխա։ Նրանք են՝ ավագ որդին՝ Դոնալդ կրտսերը, ավագ դուստրը՝ Իվանկան, կրտսեր դուստրը՝ Թիֆանին և կրտսեր որդին՝ Բարոնը (իր ներկայիս կնոջից՝ Մելանյայից)։ Նա նաև ունի 11 թոռ։

Նախագահ Թրամփն ինքը մի քանի անգամ խոսել է հնարավոր երրորդ ժամկետի մասին։ ԱՄՆ-ի Սահմանադրության համաձայն՝ կարելի է նախագահ լինել միայն երկու ժամկետ անընդմեջ։