BRICS բանկը հաստատել է Կոլումբիայի և Ուզբեկստանի անդամակցության հայտերը

BRICS Նոր զարգացման բանկի (ՆԶԲ) ղեկավարությունն արդեն հաստատել է Կոլումբիայի և Ուզբեկստանի անդամակցության հայտերը և քննարկում է Եթովպիայի և Ինդոնեզիայի անդամակցության հարցը։ Այս մասին հայտարարել է ֆինանսական կազմակերպության ղեկավար Դիլմա Ռուսեֆը Ռուսաստանի նախագահ Վլադիմիր Պուտինի հետ հանդիպման ժամանակ։

«Երկու երկիր արդեն ընտրվել է՝ որպես անդամ. դրանք Ուզբեկստանն ու Կոլումբիան են։ Երկու երկրների՝ Եթովպիայի և Ինդոնեզիայի հայտերը քննարկվում են»,- նշել է նա։

Ռուսեֆը նաև շնորհակալություն է հայտնել Ռուսաստանի ղեկավարին ՆԶԲ-ի ղեկավարի պաշտոնում վերընտրվելու գործում իր աջակցության համար։ Նրա խոսքով՝ բանկի առջև դեռևս հիմնական խնդիրն է BRICS երկրների կողմից տեղական արժույթների օգտագործման ընդլայնման խթանումը, ինչպես նաև նոր հարթակների մշակումը, այդ թվում՝ թվային, ազգային արժույթների հիման վրա առևտրային փոխազդեցությունն ապահովելու համար։