Էրդողանը հանձնարարել է աշխատել նոր սահմանադրության վրա

Թուրքիայի նախագահ Ռեջեփ Թայիփ Էրդողանը հայտարարել է, որ նշանակել է տասը իրավական փորձագետներից բաղկացած խումբ և լիազորել է նրանց՝ սկսել աշխատանքը նոր սահմանադրության վրա, հաղորդում է AP-ն։ «23 տարի շարունակ մենք բազմիցս ցույց ենք տվել մեր անկեղծ մտադրությունները՝ մեր ժողովրդավարությունը պսակելու քաղաքացիական ազատությունների նոր Սահմանադրությամբ»,- ասել է նա։

Մայիսի 22-ին Էրդողանը հայտարարեց, որ չի պլանավորում առաջադրվել ևս մեկ նախագահական ժամկետով։ Այս հայտարարությունը նա արել է Բուդապեշտից Անկարա թռչող ինքնաթիռում՝ Թյուրքական պետությունների կազմակերպության ոչ պաշտոնական գագաթնաժողովին մասնակցելուց հետո։ Էրդողանը շեշտեց, որ ինքը չի մտահոգվում վերընտրվելու համար, և որ իր առաջնահերթությունը Թուրքիայի համար նոր Սահմանադրության ստեղծումն է։