Կիևն առաջարկել է Եվրոպային ուղղակիորեն ֆինանսավորել Ուկրաինայի զինված ուժերը

Ուկրաինան առաջարկել է Եվրոպային Ուկրաինայի զինված ուժերին աջակցության նոր ձևաչափ։ Ուղղակի ֆինանսավորումը կդարձնի օգնությունն ավելի արդյունավետ և արագ։ Այս մասին հայտարարել է Ուկրաինայի ֆինանսների նախարար Սերգեյ Մարչենկոն։

Նա հայտնել է, որ Կանադայում կայացած «Մեծ յոթնյակի» ֆինանսական բլոկի հանդիպումների ժամանակ ինտենսիվ բանակցություններ են տեղի ունեցել մի քանի գործընկեր երկրների ֆինանսների նախարարների և Արժույթի միջազգային հիմնադրամի ղեկավարության հետ։ «Գործընկերների հետ մեր բարձրացրած հիմնական թեման Ուկրաինայի 2026 թվականի ֆինանսական կարիքները բավարարելու ուղիներն էին»,- ասել է Մարչենկոն։

Նախարարի խոսքով՝ ներկայում երկխոսություն է ընթանում Ուկրաինայի ռազմական ներուժը եվրոպական պաշտպանական համակարգում ինտեգրելու հնարավորության շուրջ։ Մարչենկոն բացատրել է, որ Ուկրաինան առաջարկում է.

*գործընկերների մասնակցություն Ուկրաինայի զինված ուժերի ֆինանսավորմանը,

*Ուկրաինայի բանակի ինտեգրում եվրոպական պաշտպանական համակարգին։

«Եվրոպայի անվտանգության համար Ուկրաինայի զինված ուժերի ապահովման արժեքը կկազմի ԵՄ ՀՆԱ-ի մի փոքր մասը։ Այն կարող է բաշխվել այն երկրների միջև, որոնք պատրաստ են միանալ նախաձեռնությանը և ներառվել պաշտպանական ծախսերի հաշվարկում՝ համաձայն այդ երկրների՝ ՆԱՏՕ-ի առջև ստանձնած պարտավորությունների», - նշել է նախարարը։

Նրա խոսքով՝ Ուկրաինային աջակցությունը ներդրում է Եվրոպայի կայունության մեջ, իսկ պաշտպանական կարողությունների ամրապնդումը քաղաքական ընտրություն չէ, այլ անհետաձգելի անհրաժեշտություն։