ԱՄՆ-ն ու Չինաստանը փոխադարձաբար նվազեցնում են մաքսատուրքերը

ԱՄՆ-ն ու Չինաստանը համաձայնության են եկել 90 օրով փոխադարձաբար նվազեցնել առևտրային մաքսատուրքերը։

Վաշինգթոնը չինական ապրանքների մեծ մասի վրա մաքսատուրքերը կնվազեցնի մինչև 30%, հայտարարել է ԱՄՆ ֆինանսների նախարար Սքոթ Բեսենթը։ Պեկինն ամերիկյան ապրանքների մաքսատուրքերը կնվազեցնի մինչև 10%։

Սպիտակ տան հայտարարության մեջ ասվում է, որ փոփոխություններն ուժի մեջ կմտնեն մայիսի 14-ից։

Հիշեցնենք՝ ներկայումս ԱՄՆ-ի կողմից չինական ապրանքների վրա սահմանված մաքսատուրքերը կազմում են 145%, մինչդեռ Չինաստանի կողմից ամերիկյան ապրանքների վրա սահմանված մաքսատուրքերը կազմում են 125%։

Բեսենթը պարզաբանել է, որ հայտարարված փոփոխությունները չեն վերաբերում ԱՄՆ նախագահ Դոնալդ Թրամփի վարչակազմի կողմից Վաշինգթոնի բոլոր առևտրային գործընկերների նկատմամբ սահմանված ոլորտային տուրքերին։

«Միացյալ Նահանգները և Չինաստանը կստեղծեն մեխանիզմ՝ տնտեսական և առևտրային հարցերի շուրջ բանակցությունները շարունակելու համար»,- ասվում է Սպիտակ տան հայտարարության մեջ։