Իշխանության համար հարկերի հավաքումն ավելի օրակարգային է, քան Ցեղասպանության ճանաչումը. «Ժողովուրդ»

«Ժողովուրդ»-ը գրում է. «Հարկերի հավաքման գործընթացը դարձել է էլ ավելի օրակարգային հարց իշխանությունների համար, քան Ցեղասպանության հանրահռչակումն ու ճանաչումը։ Հարկատուին «հերոս» անվանող իշխանությունը հարկերի հավաքման սահմանված շեմը, կարծես թե, չի գերազանցում։
Նախորդ տարվա հարկերի հավաքագրումը ձախողելուց և 223 մլրդ դրամ թերհավաքագրումից հետո սկսվեց հարկային տեռորը. 1%-ը դարձավ 5%, 5%-ը՝ 10%, իսկ բողոքող տնտեսվարողների կարծիքը ոչ ոք հաշվի չառավ։
Պետեկամուտների կոմիտեն փորձում է տպավորություն ստեղծել, թե այս տարի իրավիճակը շտկվել է։ ՊԵԿ-ից նախորդ ամիս հայտարարեցին, որ առաջին եռամսյակի պլանը նույնիսկ գերակատարել են։ Նախատեսվածից ավելի հարկային եկամուտներ են հավաքել։
«2025 թվականի առաջին եռամսյակի ընթացքում ՀՀ պետական եկամուտների կոմիտեն ապահովել է 566.5 մլրդ դրամ հարկային եկամուտներ և պետական տուրքեր, ինչը 2025 թվականի պետական բյուջեի եռամսյակային համամասնություններով առաջին եռամսյակի համար նախատեսված ցուցանիշից՝ 563.1 մլրդ դրամից, ավելի է 3.4 մլրդ դրամով կամ 0.6 տոկոսով, իսկ վերանայված ցուցանիշից՝ 563.4 մլրդ դրամից, ավելի է 3.1 մլրդ դրամով կամ 0.5 տոկոսով»,- հայտարարել էր ՊԵԿ-ը։

Կրկին հանրության առաջ բարձրագոչ թվեր են ներկայացնում, որոնք իրականում այնքան էլ լավ արդյունք չեն, քանի որ պետք է դիտարկել ոչ թե թվերը, այլ դրանց հավաքման կամ էլ տնտեսվարողներից շորթելու ձևերը։

Նշենք, որ նախատեսել են հավաքել 563.4 միլիարդ, հավաքել են 566.5 մլրդ դրամ՝ 3.1 մլրդ դրամով ավելի։ Եվ սա՝ տնտեսավողների ուսերին հավելյալ հարկային բեռ ու պարտավորություն ավելացնելով»։