«Վատիկանում Զելենսկին ավելի շատ զենք է խնդրել». Թրամփ

ԱՄՆ նախագահ Դոնալդ Թրամփը հայտարարել է, որ Ուկրաինայի նախագահ Վլադիմիր Զելենսկին Վատիկանում կայացած հանդիպման ժամանակ իրենից հավելյալ զենք է խնդրել։ Այս մասին Թրամփը հայտնել է ճեպազրույցի ժամանակ։

«Նա (Զելենսկին) ասել է, որ իրեն ավելի շատ զենք է պետք։ Բայց այդ մասին նա խոսում է արդեն երեք տարի։ Տեսնենք, թե ինչպես կզարգանան իրադարձությունները»,- նշել է Թրամփը՝ մեկնաբանելով Ուկրաինայի նախագահի հետ իր առանձնազրույցը։

ԱՄՆ նախագահը հավելել է, որ Ռուսաստանը շատ հիասթափված է Ուկրաինայի կողմից էներգետիկ օբյեկտներին հարվածներից՝ էներգետիկ ենթակառուցվածքներին ուղղված 30-օրյա հրադադարի հայտարարությունից հետո։

Թրամփը, ընդհանուր առմամբ, բարձր է գնահատել ապրիլի 26-ին Վատիկանում տեղի ունեցած իր հանդիպումը Զելենսկու հետ և նշել, որ նա «ավելի հանգիստ» է դարձել։

Հանդիպումից հետո Զելենսկին հայտնել էր, որ Թրամփի հետ քննարկել է Ուկրաինայում հրադադարի հետ կապված հարցեր։ Նա նշել էր, որ զրույցն արդյունավետ էր և հույս հայտնել երկարատև խաղաղության հասնելու հարցում։