Ռուսաստանը հրաժարվել է Սիրիայի նոր իշխանություններին հանձնել Բաշար ալ-Ասադին

Ռուսաստանը հրաժարվել է Սիրիայի նոր իշխանություններին հանձնել Բաշար ալ-Ասադին, ով տապալվելուց հետո փախել էր Մոսկվա։

Այս մասին The New York Times-ին տված հարցազրույցում ասել է Սիրիայի անցումային շրջանի նախագահ Ահմեդ ալ-Շարաան։

Սա առաջին պաշտոնական հաստատումն է, որ ռուսական իշխանությունները հրաժարվել են Ասադին արտահանձնել։ Ասադն իր ընտանիքի հետ դեկտեմբերին փախել է Ռուսաստան, իսկ հունվարին սիրիական նոր իշխանությունները խնդրել են նրան արտահանձնել։ Միաժամանակ, չնայած մերժմանը, ալ-Շարաան և նրա շրջապատը պատրաստ են շարունակել բանակցությունները Կրեմլի հետ։

«Ռուսաստանը ՄԱԿ-ի Անվտանգության խորհրդի մշտական ​​անդամ է: Սիրիայում բոլոր զենքերը ռուսական են: Կան մի շարք պարենային և էներգետիկ համաձայնագրեր, որոնց վրա Սիրիան հենվել է տարիներ շարունակ: Մենք պետք է հաշվի առնենք սիրիական շահերը»,- ասել են սիրիական իշխանությունները:

Նախագահի խոսքով՝ Սիրիայի կառավարությունը բանակցություններ է վարում ինչպես Ռուսաստանի հետ, որն աջակցում էր Ասադին, այնպես էլ Թուրքիայի հետ, որը պաշտպանում էր ալ-Շարաային, երբ նա «Հայաթ Թահրիր ալ-Շամ» խմբավորման առաջնորդն էր։

Ռուսաստանի և Սիրիայի նոր իշխանությունների միջև առաջին պաշտոնական բանակցությունները տեղի ունեցան հունվարի վերջին, երբ Դամասկոս այցելեց ՌԴ ԱԳՆ ղեկավարի տեղակալ Միխայիլ Բոգդանովի գլխավորած պատվիրակությունը։ Հանդիպումից հետո սիրիական կողմը հայտարարություն է տարածել, որ Դամասկոսն ակնկալում է, որ Մոսկվան կընդունի անցյալի սխալները, փոխհատուցում կհատկացնի և կօգնի Սիրիայի վերականգնմանը։ Հաղորդվել է նաև, որ կողմերը քննարկում են Լաթաքիայում ռուսական երկու ռազմակայանների ճակատագիրը։