«ԱՄՆ-ի և ՌԴ-ի միջև բանակցությունները նախատեսված են մարտի 23-ին՝ Ջիդդայում»․ Ուիթքոֆ

ԱՄՆ-ի և Ռուսաստանի միջև հրադադարի շուրջ բանակցությունները կկայանան մարտի 23-ին՝ Ջիդդայում։ Այս մասին Fox News-ի փոխանցմամբ՝ հայտնել է ԱՄՆ նախագահի հատուկ բանագնաց Սթիվ Ուիթքոֆը։
Ուիթքոֆը նշել, որ Ջիդդայի բանակցություններում ամերիկյան կողմը կներկայացնեն ԱՄՆ ազգային անվտանգության հարցերով խորհրդական Մայք Ուոլցը և պետքարտուղար Մարկո Ռուբիոն, սակայն ՌԴ պատվիրակության կազմի, ինչպես նաև Ուկրաինայի հնարավոր մասնակցության մասին դեռևս հայտնի չէ։
«Մինչև վերջերս իրականում համաձայնություն չունեինք երկու կետերի շուրջ, որոնք են՝ էներգետիկ և այլ ենթակառուցվածքներին ուղղված հրադադարը, ինչպես նաև սևծովյան տարածքում կրակի դադարեցումը։ Այսօր այդ հարցում համաձայնության հասանք և, կարծում եմ, որ այդ կետից մինչև լիակատար հրադադար, համեմատաբար կարճ ճանապարհ է»,- ուղիղ եթերում ասել է Ուիթքոֆը՝ հույս հայտնելով, որ ուկրաինական կողմը նույնպես կհամաձայնի այդ կետերին։
Նրա խոսքով՝ Պուտինի հետ իր վերջին հանդիպման ժամանակ բավականին մեծ առաջընթաց է գրանցվել։ «Կցանկանայի ընդգծել այն մեծ տարբերությունը, որը գոյություն ուներ Ուկրաինայի և Ռուսաստանի միջև բանակցություններից առաջ և հետո»,- CBS News-ին հայտնել է Ուիթքոֆը։
Հիշեցնենք, որ մարտի 18-ին, ԱՄՆ նախագահ Դոնալդ Թրամփի հետ հեռախոսազրույցի ժամանակ, ՌԴ նախագահ Վլադիմիր Պուտինը համաձայնել էր էներգետիկ ենթակառուցվածքների դեմ կրակի 30-օրյա դադարեցմանը, ինչպես նաև Սև ծովում նավարկության անվտանգության ապահովմանը, որն առաջարկել էր ԱՄՆ նախագահը։ Պայմանավորվածություն էր ձեռք բերվել նաև բանակցություններ սկսել այդ համաձայնության մանրամասների շուրջ։