Բանակցություններում ձախողման դեպքում Ուկրաինան վտանգում է կորցնել հետագա աջակցությունը. The Economist

The Economist-ը հայտնում է, որ Ուկրաինայի և ԱՄՆ-ի միջև առաջիկա բանակցությունները կարող են չափազանց կարևոր լինել Կիևի համար: Ձախողման դեպքում Ուկրաինան վտանգում է կորցնել հետագա աջակցության հնարավորությունը։

ՌԴ Քաղաքական գիտությունների ակադեմիայի խորհրդի անդամ և PRISP կենտրոնի փորձագետ Վլադիմիր Շապովալովը NewsInfo-ի համար մեկնաբանել է ԱՄՆ-ի և Ուկրաինայի միջև հարաբերություններում հնարավոր փոփոխությունները:

Շապովալովի խոսքով, Թրամփի բանակցային ոճը սկզբնական փուլում բնութագրվում է կոշտությամբ, սակայն հետագայում կարող է մեղմանալ։

«Թրամփը հաճախ սկսում է բանակցային բարձր դիրքից՝ շատ կոշտ պահանջներով, բայց հետո անցնում է ավելի մեղմ դիրքի»,- նշել է փորձագետը։

Նա չի բացառել, որ Թրամփը կարող է գործարք կնքել Կիևի ռեժիմի հետ՝ բավարարվելով «հաշտարար դիրքորոշման հավաստիացումներով ու հայտարարություններով» և ստորագրելով հանքային ռեսուրսների ոլորտում համագործակցության համաձայնագիր։

Սակայն Շապովալովն ընդգծել է, որ Վլադիմիր Զելենսկու կերպարը Թրամփի համար մնում է «անընդունելի»։

«Զելենսկին շատ վնաս է հասցրել անձամբ Թրամփին, և, հետևաբար, Կիևի ռեժիմի վերաբերյալ Թրամփի դիրքորոշման հնարավոր մեղմացումը չի ուղեկցվի նրա աչքին Զելենսկու հեղինակության վերականգնմամբ: Թրամփն, ամենայն հավանականությամբ, կուզենա Կիևի ղեկավար տեսնել այլ անձի»,- ասաել է փորձագետը։

Բացի այդ, ըստ Շապովալովի, Թրամփի համար անընդունելի են Զելենսկու և Եվրոմիության միջև առանձին բանակցությունները։ Նրա համար կարևոր է նաև հնարավորինս հեռու մնալ ուկրաինական հակամարտությունից՝ «ազգային շահերը պաշտպանելու և ֆինանսական հոսքերի մսխումը նվազագույնի հասցնելու համար»։