Իվանիշվիլիի նախկին խորհրդականը գաղտնի փախել է Հայաստան

Վրաստանի իշխող «Վրացական երազանք» կուսակցության հիմնադիր և պատվավոր նախագահ Բիձինա Իվանիշվիլիի նախկին օգնական, Համաներդրումային հիմնադրամի նախկին նախագահ Գեորգի Բաչիաշվիլին փախել է Հայաստան։ Այս մասին ասվում է Վրաստանի ՆԳՆ հայտարարության մեջ։
Հաղորդվում է, որ մարտի 2-ին Բաչիաշվիլին գաղտնի հատել է Վրաստանի պետական ​​սահմանը՝ ավտոմեքենայի մեջ հատուկ կազմակերպված թաքստոցում շրջանցելով սահմանային անցակետը, ապա Հայաստանի սահմանային անցակետում ներկայացրել է ՌԴ քաղաքացիությունը հաստատող մեկ այլ անձնագիր և հատել սահմանը։

Բաչիաշվիլին, ով Վրաստանում մեղադրվում է երկու քրեական գործերով և գրավ վճարելուց հետո ազատության մեջ էր, մարտի 4-ին սոցցանցերում հայտարարել է, որ լքել է երկիրը կյանքին սպառնացող սպառնալիքների պատճառով։ Դրա հետ կապված՝ Վրաստանում նրան մեղադրանք է առաջադրվել սահմանն ապօրինի հատելու համար։

Վրաստանի ՆԳՆ-ն շարունակում է որոնել նրանց, ովքեր օգնել են Բաչիաշվիլիին փախչել երկրից։

Նշենք, որ Բաչիաշվիլին մեղադրվում է Բիձինա Իվանիշվիլիից 8253,13 բիթքոյն գողանալու համար (2017 թվականին 39,21 միլիոն դոլար արժողությամբ, ընթացիկ արժեքը՝ ավելի քան 200 միլիոն դոլար)։

Բաչիաշվիլին հերքում է իրեն առաջադրված մեղադրանքը։