Բացվելուց կարճ ժամանակ անց Վերին Լարսը փակվեց բեռնատարների համար

Վրաստանի ռազմավարական մայրուղով ծանր բեռնատարների տեղաշարժը կրկին արգելվել է երթևեկության վերականգնումից 3,5 ժամ անց, հայտնում է Հյուսիսային Օսիայի ԱԻՆ գլխավոր վարչության մամուլի ծառայությունը։

«Վրաստանում եղանակային պայմանների վատթարացման և անվտանգ անցում ապահովելու անհնարինության պատճառով ծանր բեռնատար մեքենաների տեղաշարժը ՌԴ Վլադիկավկազ քաղաքից դեպի Վրաստանի Լարս բնակավայր արգելվում է Մոսկվայի ժամանակով ժամը 20:45-ից (Երևանի ժամանակով ժամը 21:45-ից) մինչև հետագա ծանուցում»,- ասվում է հաղորդագրության մեջ։

Հյուսիսային Օսիայի երթևեկության կառավարման կենտրոնի տվյալներով՝ Վերին Լարսի անցակետով անցնելու էլեկտրոնային հերթում այս պահին գրանցված է ավելի քան 3300 ծանր մեքենա։

Այսօր ավելի վաղ հաղորդվել էր, որ եղանակային պայմանների բարելավման պատճառով ճանապարհը բացվել է բոլոր տեսակի տրանսպորտային միջոցների համար Երևանի ժամանակով 16:45-ին։

Վրացական ռազմական մայրուղին Ռուսաստանը Վրաստանի և Հայաստանի հետ կապող միակ ցամաքային ճանապարհն է։