«Ուկրաինայի վերաբերյալ գործարքից հետո ամերիկյան բիզնեսը կարող է վերադառնալ Ռուսաստան». Սթիվեն Վիթքոֆ

ԱՄՆ-ի նախագահի հատուկ բանագնաց Սթիվեն Վիթքոֆը խոստովանել է, որ եթե Ուկրաինայի դեմ Ռուսաստանի պատերազմն ավարտվի, ամերիկյան ընկերությունները կարող են վերադառնալ ռուսական շուկա։

«Մենք Ռուսաստանի հետ կոնկրետ քննարկում չենք ունեցել այն հանդիպմանը, որի մասին դուք խոսում եք, բայց ես կարծում եմ, որ ակնհայտորեն ակնկալիք կա, որ եթե մենք հասնենք խաղաղության համաձայնագրի, ամերիկյան ընկերությունները կկարողանան վերադառնալ և այնտեղ բիզնես անել»,- ասել է Վիթքոֆը CBS-ի եթերում:

Փետրվարի 21-ին իրազեկ աղբյուրները հայտնել են Financial Times-ին, որ ամերիկյան մի քանի ընկերություններ նախնական հետաքրքրություն են հայտնել ռուսական շուկայում իրենց գործունեությունը վերսկսելու վերաբերյալ։ Նույն օրը նախագահ Վլադիմիր Պուտինը հայտարարել է, որ ռուսական շուկան պետք է պատրաստ լինի արտասահմանյան ընկերությունների վերադարձին։ Միաժամանակ, ըստ նախագահի, հայրենական արտադրողները պետք է նախապատվություններ ունենան։