«46 հազար զոհ, տասնյակ հազար անհետ կորած, 380 հազար վիրավոր». Զելենսկին` Ուկրաինայի կորուստների մասին

Ուկրաինայի նախագահ Վլադիմիր Զելենսկին նշել է լայնամասշտաբ պատերազմի սկսվելուց ի վեր ուկրաինական զորքերի զոհերի թիվը։ Այս մասին նա հայտարարել է NBC News-ին տված հարցազրույցում։

Նրա խոսքով՝ Ուկրաինան լայնամասշտաբ պատերազմի ընթացքում կորցրել է ավելի քան 46 հազար պաշտպան։ Նախագահը հավելել է, որ ևս տասնյակ հազարավոր զինվորներ անհետ կորել են կամ կարող են գերության մեջ լինել։ Բացի այդ, կա 380 հազար վիրավոր:

Երկրի ղեկավարի խոսքով՝ ժամանակավորապես օկուպացված տարածքներում խաղաղ բնակչության շրջանում զոհերի ստույգ թիվը մնում է անհայտ։

«Եվս տասնյակ հազարներ անհայտ կորած կամ գերության մեջ են։ Սա այն է, ինչ մենք գիտենք: Ազատագրված տարածքներում զանգվածային գերեզմաններն ու հանցագործությունները վկայում են ռուսական ահաբեկչության մասշտաբների մասին»,- ասել է Զելենսկին։