«Պարզ է դառնում, թե ով է քաղաքական դիվիդենտ ստանում՝ հանրությանը մանիպուլացնելով»․ Թադևոս Ավետիսյան

ԱԺ «Հայաստան» խմբակցության պատգամավոր Թադևոս Ավետիսյանի ֆեյսբուքյան գրառումը. «Թռիչքաձև աճող պետական պարտքն արդեն հուզում է բարձրաստիճան պաշտոնյաներին։
Ասեմ, որ չիմացողներն իմանան։
Ըստ պաշտոնական վիճակագրության վերջին տվյալների՝ 2024 թվականի դեկտեմբերի 31-ի դրությամբ Հայաստանի Հանրապետության պետական պարտքը կազմում է 12 միլիարդ 842 միլիոն 240 հազար ԱՄՆ դոլար, այլ ոչ թե 12 միլիարդ ԱՄՆ դոլար։
Ի դեպ, 2023 թվականի նույն ժամանակահատվածի համեմատ պետական պարտքն աճել է շուրջ 1 միլիարդ ԱՄՆ դոլարով, իսկ 2018 թվականի նույն ժամանակահատվածի համեմատ՝ կրկնապատկվել է։
Բարձրաստիճան որոշ պաշտոնյաների համար հատուկ ընդգծում եմ. ՀՀ արտաքին պարտքը պաշտոնական վերջին տվյալներով՝ 2024 թվականի դեկտեմբերի 31-ի դրությամբ կազմում է 6 միլիարդ 454 միլիոն 151 հազար ԱՄՆ դոլար, այլ ոչ թե 5 միլիարդ 962 միլիոն ԱՄՆ դոլար։
Կարծում եմ հիմա պարզ է դառնում, թե ով է քաղաքական դիվիդենտ ստանում՝ հանրությանը մանիպուլացնելով կամ չտեղեկացված լինելու հետևանքով»։