Կանադայի վարչապետ Ջասթին Թրյուդոն հեռանում է

1701

Երկուշաբթի, 06 հունվարի, 2025 թ., 20:55

Կանադայի վարչապետ Ջասթին Թրյուդոն հեռանում է իշխող Լիբերալ կուսակցության ղեկավարի պաշտոնից, սակայն կմնա կառավարության ղեկավարի պաշտոնում այնքան ժամանակ, քանի դեռ լիբերալները չեն ընտրել նոր առաջնորդ։ Այս մասին հաղորդում է BBC-ն։

Իր որոշման մասին Թրյուդոն հայտարարել է այսօր առավոտյան կայացած մամուլի ասուլիսում։

Կանադական լրատվամիջոցների աղբյուրները պարզաբանել են, որ Թրյուդոն որոշել է հայտարարել իր հրաժարականի մասին Լիբերալ կուսակցության ազգային համագումարից առաջ, որը կսկսվի չորեքշաբթի։ Այնտեղ կորոշվի կուսակցության ղեկավարության վերընտրության հարցը: Ենթադրվում է, որ Թրյուդոն ցանկացել է խուսափել անցանկալի իրավիճակից, երբ իր կուսակցության անդամները կհեռացնեն իրեն ղեկավարի պաշտոնից։
Թրյուդոն ղեկավարել է կուսակցությունը 2013 թվականից, իսկ վարչապետ է դարձել 2015 թվականին, երբ լիբերալները հաղթել են խորհրդարանական ընտրություններում։