Աբխազիայում սուգ է. 5 երեխա հրդեհի զոհ է դարձել

Աբխազիայում հրդեհի ժամանակ երեխաների մահվան կապակցությամբ հունվարի 6-ը սգո օր է հայտարարվել։

«Գալիի շրջանի Սաբերիո գյուղում տեղի ունեցած ողբերգության կապակցությամբ, որի հետևանքով հինգ երեխա է մահացել, նախագահի պաշտոնակատար Բադրա Գյունբայի հրամանագրով հունվարի 6-ն Աբխազիայում սգո օր է հայտարարվել»,- տեղեկացնում է հանրապետության ղեկավարի մամուլի ծառայությունը։

Նշենք, որ հունվարի 5-ի առավոտյան առանձնատանը բռնկված հրդեհի հետևանքով հինգ երեխա է մահացել։

Երեխաների հետ տանը միայն տատիկն է եղել. նախնական տվյալներով՝ նա որոշել է վառել վառարանը, սակայն բենզինը շփոթել է դիզվառելիքի հետ, ինչի հետևանքով պայթյուն է եղել։ Երեխաներն այդ պահին քնած են եղել: Տատիկը դուրս է վազել՝ օգնություն կանչելու, սակայն հ րդեհն ակնթարթորեն տարածվել է փայտե տան ողջ տարածքում։

«Այդ ժամանակ քնած են եղել մեկուկեսից մինչև ութ տարեկան հինգ երեխաներ, տունն ակնթարթորեն այրվել է, և նրանց փրկել չի հաջողվել»,- ասել է ականատեսը։ Մահացած բոլոր երեխաները քույրեր են եղել, նրանց ծնողները եղել են հիվանդանոցում: