«Տիգրան Ավինյանը հերթական խայտառակ որոշման նախագիծն է բերում». Իզաբելլա Աբգարյան
143
Երկուշաբթի, 08 ապրիլի, 2024 թ., 23:54
Երևանի ավագանու «Ազգային առաջընթաց» խմբակցության անդամ Իզաբելլա Աբգարյանը գրում է. «Երևանի ավագանու դերն ու կշիռը այդպես էլ չհասկացած քաղաքապետ Տիգրան Ավինյանը հերթական խայտառակ որոշման նախագիծն է բերում առաջիկա նիստի օրակարգ: Ըստ իր կողմից առաջարկվող նախագծի՝ ավագանու խմբակցությունների ղեկավարները պետք է մեկ անգամ իրավունք ունենան նախքան քվեարկությունը 15 րոպե ընդմիջում վերցնել՝ ներկայիս երեք անգամվա փոխարեն: Տեղեկացնենք, որ այդ ընդմիջումներն անհրաժեշտ են լինում, որ խմբակցությունները հստակեցնեն իրենց քվեարկությունը՝ անհրաժեշտ դեպքում փոխելով այն: Նման անհրաժեշտություն կարող է առաջանալ տարբեր պատճառներով, ինչպես, օրինակ, հարց ու պատասխանի կամ ելույթների փուլում ի հայտ եկած նոր հանգամանքների առկայությամբ: Գուցե «որոշումները գրպաններում» նիստի եկածների համար նման կարիք չի առաջանում, բայց ժողովրդավար աշխատելաոճ որդեգրած խմբակցությունների համար նորմալ է քվեարկությունից առաջ կարծիք փոխելը կամ խմբակցության անդամներից մեկի պահանջով նման փոփոխությունները քննարկելը: Ինքնին Ավագանու նսեմացում, խամաճիկացում է գործադիրի կողմից ավագանու նիստի կանոնակարգին միջամտելը, փոփոխելը: Այն պետք է բացառապես լինի ավագանու տիրույթում: Եթե իշխանություններն այդպիսով փորձում են ժամանակ խնայել, ապա ընդդիմությունը կարող է յուրաքանչյուր հարցից հետո ամբողջ կազմով գրանցվել թե՜ հարցերի, թե՜ ելույթների համար: Հաջորդ նիստին էլ դա՞ պիտի փոխեն: Արևմտյան արժեքներից խոսացող իշխող կուսակցությունները հերթական անգամ ապացուցում են, որ գաղափար չունեն դրանց էությունից և ժողովրդավար ուղու փոխարեն գնում են ավտորիտարիզմի ճանապարհով: Եթե ՔՊում մնացել են մարդիկ, որ հասկանում են՝ ինչի մասին է խոսքը, թող բացատրեն քաղաքապետարանի իրենց կուսակիցներին և հորդորեն հանել օրակարգից այս՝ հերթական խայտառակությունը»: