Դամասկոսում հարձակման է ենթարկվել Իրանի հյուպատոսությունը. զոհերի թվում է ԻՀՊԿ-ի գեներալը

Իսլամական հեղափոխության պահապանների կորպուսի գեներալ Մոհամմադ Զահեդին սպանվել է Դամասկոսում Իրանի հյուպատոսության վրա իսրայելական հարձակման հետևանքով, հայտնում է իրանական Fars պետական ​​գործակալությունը։

Հաղորդվում է, որ հարձակման ժամանակ զոհվել են նաև իրանցի դիվանագետներ:

Դուբայից (ԱՄԷ) հեռարձակվող Al Hadath հեռուստաալիքը հայտնել է, որ հրթիռներից մեկն ընկել է վիլլա, որն օգտագործվում է լիբանանյան և պաղեստինյան կազմակերպությունների ներկայացուցիչների հետ հանդիպումների համար։ Իրանի դեսպանը եղել է դեպքի վայրում, սակայն չի տուժել, պնդում է հեռուստաալիքը։

Իրանի դիվանագիտական ​​առաքելության համալիրի մոտ կան վիլլաներ, որտեղ ապրում են Իսլամական հեղափոխության պահապանների կորպուսի իրանցի ռազմական խորհրդականները։

Իսրայելի պաշտպանության բանակը հրաժարվել է մեկնաբանել իսրայելական զինվորականների՝ Դամասկոսին հարվածելու մասին տեղեկությունը։ «Մենք չենք մեկնաբանում օտարերկրյա ԶԼՄ-ների հաղորդագրությունները»,- ՏԱՍՍ-ի հարցմանը հեռախոսով պատասխանել է բանակի մամուլի ծառայության ներկայացուցիչը։