Կիմ Չեն Ընը Ռուսաստանում կհանդիպի Պուտինի հետ

Հյուսիսային Կորեայի առաջնորդ Կիմ Չեն Ընը ծրագրում է սեպտեմբերին այցելել Ռուսաստանի Դաշնություն և հանդիպել ՌԴ նախագահ Վլադիմիր Պուտինի հետ։ Այս մասին հայտնում է The New York Times-ը (NYT)՝ վկայակոչելով ԱՄՆ պաշտոնյաների և նրանց դաշնակիցների աղբյուրները։

Աղբյուրն ընդգծում է, որ Կիմ Չեն Ընը Փհենյանից, հավանաբար, զրահապատ գնացքով կուղևորվի Վլադիվոստոկ, որտեղ կհանդիպի Պուտինի հետ։ Վարկածներից մեկի համաձայն, Հյուսիսային Կորեայի առաջնորդը կարող է մեկնել Մոսկվա, «սակայն դա միանշանակ չէ»։

«Պուտինը ցանկանում է, որ Կիմ Չեն Ընը համաձայնի հրետանային արկեր և հակատանկային հրթիռներ ուղարկել Ռուսաստան, իսկ Հյուսիսային Կորեայի առաջնորդը ցանկանում է, որ Մոսկվան արբանյակների և միջուկային սուզանավերի առաջադեմ տեխնոլոգիաներ փոխանցի Փհենյանին»,- ասում են աղբյուրները:

Նրանք նաև պնդում են, որ երկուսն էլ կժամանեն Հեռավոր Արևելքի դաշնային համալսարան՝ մասնակցելու Արևելյան տնտեսական ֆորումին, որը կանցկացվի սեպտեմբերի 10-ից 13-ը։

Մինչ այս ՌԴ նախագահի մամուլի քարտուղար Դմիտրի Պեսկովը հայտնել էր, որ Ռուսաստանն ու ԿԺԴՀ-ն լավ, փոխադարձ հարգալից հարաբերություններ են պահպանում։