Նիգերի նախագահը ձերբակալվել է իր իսկ անվտանգության աշխատակիցների կողմից

Նիգերի նախագահական գվարդիան ձերբակալել է պետության ղեկավար Մուհամեդ Բազումին։ Նիգերի բանակը, ըստ նախագահի գրասենյակի, չի աջակցել աֆրիկյան երկրի ղեկավարի պահակախմբի ապստամբությանը։
Նախագահական գվարդիան արգելափակել է մուտքը պետության ղեկավարի նստավայր և բանակցություններից հետո հրաժարվել է ազատ արձակել Բազումին։ Ըստ աղբյուրի՝ բանակը նրանց «վերջնագիր է տվել»։

Հաղորդվում է, որ Բազումը վերջերս քննարկում էր նախագահական գվարդիայի հրամանատար, գեներալ Օմար Չիանիին աշխատանքից ազատելու հարցը:

Նախագահի գրասենյակը X-ում (Twitter) հայտնել է, որ առանձին պահակախումբը «ապստամբություն է սկսել՝ ապարդյուն փորձելով ստանալ Ազգային զինված ուժերի և Ազգային գվարդիայի աջակցությունը»։ Նշվում է, որ բանակը պատրաստ է հարձակվել ապստամբների վրա: Նախագահականից հայտնել են նաև, որ Բազումի և նրա ընտանիքի ինքնազգացողությունը լավ է։

Մուհամեդ Բազումը նախագահ է ընտրվել 2021 թվականին։ Նախորդ նախագահի՝ Մահամադու Իսսուֆուի օրոք աշխատել է՝ որպես ներքին գործերի և արտաքին գործերի նախարարության ղեկավար։ Նա հաղթել է ընտրություններում և գլխավորել Աֆրիկայի ամենաաղքատ երկրներից մեկը և «ամենաշատ հեղաշրջումների ենթարկված» երկիրը։