Պակիստանի զորքերը մտել են մայրաքաղաք

Շարունակվող անկարգությունների պատճառով Պակիստանի մայրաքաղաք Իսլամաբադ են մտել ազգային զինված ուժերի որոշ ստորաբաժանումներ։ Պակիստանի բանակը ոստիկանական զորքերի հետ համատեղ ջանքեր են գործադրում հասարակական կարգը վերականգնելու համար։ Միևնույն ժամանակ, ցուցարարները, ըստ տեղի իրավապահների, այրել են ոստիկանական բաժանմունք և մի քանի ավտոմեքենա, անկանոն կրակ են բացել:

Պակիստանում անկարգություններ են սկսվել այն բանից հետո, երբ երկրի նախկին վարչապետ Իմրան Խանը ձերբակալվել է կոռուպցիայի մեղադրանքով: Քաղաքական գործիչը հերքել է այս մեղադրանքները՝ դրանք անվանելով կեղծ, իսկ իր կողմնակիցներին կոչ է արել «գալ պայքարել իրենց իրավունքների համար»։ Պակիստանի մի քանի քաղաքներում հարյուրավոր մարդիկ դուրս են եկել փողոցներ, որտեղ բռնկվել են բողոքի ցույցեր, որոնք վերաճել են իրավապահ մարմինների հետ բախումների։

Պակիստանում սահմանափակվել է ինտերնետի տարբեր ծառայությունների հասանելիությունը, իսկ հեռահաղորդակցության բոլոր ընկերություններին կարգադրվել է դադարեցնել իրենց ծառայությունները երկրի բոլոր խոշոր քաղաքներում: