Դիվանագիտական ​​սկանդալ. Իսրայելի ներկայացուցչին դուրս են հրավիրել Աֆրիկյան միության գագաթնաժողովից

Ադիս Աբեբայում այսօր բացված Աֆրիկյան միության 36-րդ երկօրյա գագաթնաժողովը դիվանագիտական ​​սկանդալով է սկսել աշխատանքը։ Իսրայելական լրատվամիջոցները հայտնում են, որ հեղինակավոր միջազգային միջկառավարական կազմակերպությունը, որը միավորում է 55 աֆրիկյան պետություն, չեղյալ է հայտարարել հավատարմագրումը և իր շարքերից փաստացի վռնդել է Իսրայելի պաշտոնական ներկայացուցիչ, Իսրայելի ԱԳՆ Աֆրիկայի հարցերով փոխտնօրեն Շերոն Բար-Լիին։
Միության ղեկավարությունն այս մասին որոշում է կայացրել Հարավային Աֆրիկայի և Ալժիրի ճնշման ներքո, որոնք ձգտում էին հրեական պետությանը հեռացնել Աֆրիկյան միության շարքերից, հայտնում են լրատվամիջոցները։
«Մենք այս միջադեպին շատ լուրջ ենք վերաբերվում, - մեկնաբանել է Իսրայելի ԱԳՆ-ն։- Շերոն Բար-Լին ուներ Իսրայելի հավատարմագրված ներկայացուցչի կարգավիճակ, սակայն Ալժիրի և Հարավային Աֆրիկայի ճնշման ներքո և Իրանի կողմից վերահսկվող ատելության հետևանքով նրա հավատարմագրումը չեղյալ է հայտարարվել: Մենք աֆրիկյան երկրներին կոչ ենք անում ընդդիմանալ այդ գործողություններին, որոնք վնասակար են ինչպես կազմակերպության, այնպես էլ Աֆրիկյան միության և ամբողջ մայրցամաքի համար»:
Իսրայելը, Աֆրիկյան միության 19 տարվա գոյությունից հետո, 2021 թվականի հուլիսին ընդունվել է այս կազմակերպություն՝ որպես դիտորդ։ Այնուհետև միության անդամների մեծամասնությունը կողմ է քվեարկել այս որոշմանը։ Այնուամենայնիվ, կազմակերպության գործադիր կոմիտեի նիստում նույն տարվա հոկտեմբերին Ալժիրի արտաքին գործերի նախարար Ռամտան Լամամրան առաջարկել է վերանայել այս որոշումը «իսրայելական իշխանությունների կողմից ապարտեիդի քաղաքականության շարունակության և պաղեստինցիների դեմ ամենօրյա հանցագործությունների պատճառով»: