«Ռուսաստանում զորահավաքի նոր ալիք կլինի, բայց դա չի օգնի». Իգոր Ստրելկով

Ռուսաստանում զորահավաքի նոր ալիք կլինի, բայց դա չի օգնի հաղթել Ուկրաինայի դեմ պատերազմում։ Այսպիսի հայտարարություն է արել ԱԴԾ նախկին սպա Իգոր Գիրկինը (Ստրելկով) ռուսական լրատվամիջոցներին տված հարցազրույցում։
Ստրելկովը կարծում է, որ զորահավաքի նոր ալիքը չի օգնի շրջել պատերազմի ալիքը։ «... Հնարավոր չէ նորմալ զորահավաք իրականացնել. մարդիկ, ովքեր բազմիցս ապացուցել են, որ իրենք լավ են միայն գողանալիս և վերադասների աչքերին թոզ փչելիս, այլ բանի ունակ չեն։ Ներկա իրողություններում հերթական զորահավաքը կարող է միայն կտրուկ վատթարացնել իրավիճակը։ Բայց, միևնույն է, այն կլինի, քանի որ կռիվը շարունակվելու է, կորուստները շարունակվելու են, մարդկանց կարիքը դեռ կա։ Կորուստներն իսկապես մեծ են»,- ասում է Գիրկինը։

Նա բացառել է Մոսկվայի և Կիևի միջև խաղաղության համաձայնագրի հավանականությունը. «Չեմ կարծում, որ կլինեն Մինսկի հերթական համաձայնագրեր, քանի դեռ մենք այս կռիվը տանուլ ենք տալիս ... Սա պետք է ուղղակիորեն ասել: Սկզբում իբր հաղթում էինք, ... բայց հիմա կորցնում ենք, նահանջում ենք»։

Ուկրաինական Բախմուտի գրավումն այս առումով ոչինչ չի փոխի, վստահեցրել է նա։

«Ռուսաստանն իր ներկայիս ղեկավարությամբ, ներկայիս կադրերով չի կարող հաղթել իր ներկայիս տեսքով։ Առանց միջոցներ ձեռնարկելու, կրակը բաժակներով հանգցնելով, նա չի կարող հաղթել։ Դա կարող է միայն անորոշ ժամանակով ձգձգել ռազմական գործողությունների ընթացքը»,- հայտարարել է Գիրկինը: