Մալդիվների նախկին նախագահին սպառնում է 11 տարվա ազատազրկում

Մալդիվների դատարանը նախկին նախագահ Աբդուլլահ Յամինին մեղավոր է ճանաչել կաշառակերության և փողերի լվացման համար, նրան սպառնում է 11 տարվա ազատազրկում, հայտնում է Avas-ի մալդիվյան հրատարակությունը:
«Իր դատավճռում դատավորը նախագահ Յամինին մեղավոր է ճանաչել առաջադրված մեղադրանքում»,- ասվում է հրատարակության մեջ։
Հրատարակությունը գրում է, որ երկրի նախկին նախագահի դատավարությունը սկսվել է 2022 թվականի հունվարին։ Յամինը մեղադրվում էր Աարա կղզու վաճառքից իր անձնական հաշվին գումար փոխանցելու և միջոցները լվանալու համար, ինչպես նաև նախկին պատգամավոր Յուսուֆ Նայեմից մեկ միլիոն դոլար կաշառք ստանալու համար, ով նույնպես դատարանում էր հայտնվել կաշառքի գործով։ Մալդիվյան կղզիների օրենքով տուգանքը չի կարող ավելացվել ավելի քան հինգ անգամ, ուստի պահանջվել է օրենքով նախատեսված առավելագույն հնարավոր տուգանք։ Յուսուֆ Նայեմը նույնպես մեղավոր է ճանաչվել կաշառակերության համար։
Աբդուլլահ Յամինը 2019 թվականին դատապարտվել է հինգ տարվա ազատազրկման՝ փողերի լվացման մեղադրանքով։ 2018 թվականի դեկտեմբերի կեսերին Մալդիվների քրեական դատարանը սառեցրել է 100 միլիոն մալդիվյան ռուֆիա (մոտ 6,5 միլիոն դոլար) Յամինի բանկային հաշիվներից՝ կապված ֆինանսական խարդախության հնարավորության հետաքննության հետ:

2021 թվականի նոյեմբերին Մալդիվների Գերագույն դատարանը չեղյալ հայտարարեց երկրի նախկին նախագահի նկատմամբ նախկինում կիրառված հինգ տարվա ազատազրկման դատավճիռը։