Եվրոմիությունը նոր ռազմական առաքելություն է պատրաստել Ուկրաինայի համար և 500 միլիոն եվրո տրամադրել զենք գնելու համար

ԵՄ խորհուրդը հաստատել է Ուկրաինայում ԵՄ ռազմական աջակցության առաքելություն (EUMAM Ukraine) ստեղծելու որոշումը, ասվում է կազմակերպության հաղորդագրության մեջ։

Առաքելությունը անհատական, կոլեկտիվ և մասնագիտացված ուսուցում կտրամադրի Ուկրաինայի զինված ուժերին, ներառյալ՝ տարածքային պաշտպանության ուժերը ԵՄ անդամ երկրների տարածքում։

«Առաքելության նպատակն է նպաստել Ուկրաինայի զինված ուժերի ռազմական կարողությունների բարձրացմանը՝ արդյունավետ ռազմական գործողություններ իրականացնելու համար, որպեսզի Ուկրաինային հնարավորություն ընձեռվի պաշտպանել իր տարածքային ամբողջականությունը միջազգայնորեն ճանաչված սահմաններում, արդյունավետորեն պաշտպանել իր ինքնիշխանությունը և իր քաղաքացիներին»,- ասված է ԵՄ խորհրդի հայտարարության մեջ։ Առաքելության օպերատիվ շտաբը կբացվի Բրյուսելում և կղեկավարի փոխծովակալ Էրվե Բլեժանը՝ Պաշտպանության պլանավորման և գործողությունների ուժերի տնօրենը: Առաքելությանը, ինչպես նշված է ԵՄ խորհրդի հայտարարության մեջ, կմասնակցեն Եվրոմիության անդամ երկրները, ինչպես նաև այլ միջազգային գործընկերներ։ Մասնավորապես, առաքելությունը կհամակարգի աշխատանքը ուկրաինական այլ ռազմական ուսումնական կենտրոնների հետ Մեծ Բրիտանիայում, ԱՄՆ-ում և Կանադայում:

Առաքելության աշխատանքն ի սկզբանե նախատեսված է երկու տարվա համար։ Կազմակերպության բյուջեն այս ժամանակահատվածի համար համաձայնեցված է 106,7 մլն եվրոյի չափով։

ԵՄ խորհուրդը հավանություն է տվել նաև Ուկրաինային զենք գնելու համար 500 մլն եվրոյի հատկացմանը։ Հաշվի առնելով դա՝ Խաղաղության եվրոպական հիմնադրամի շրջանակներում վեցերորդ տրանշը Ուկրաինային օգնություն տրամադրելու հարցում ԵՄ-ի ներդրումը կկազմի 3,1 մլրդ եվրո։

Նոր տրանշից 490 մլն եվրոն կծախսվի ռազմական տեխնիկայի, իսկ 10 մլն եվրոն՝ ուկրաինացի զինվորականների համար անձնական պաշտպանության միջոցների, առաջին օգնության փաթեթների և վառելիքի ձեռքբերման վրա։ Հատկացված միջոցները, ինչպես հստակեցված է ԵՄ Խորհրդում, կօգտագործվեն նաև ռազմական տեխնիկայի վերանորոգման և պահպանման համար, որոնք ԵՄ անդամ երկրներն արդեն փոխանցել են Ուկրաինային։