Երևան`   0 °C
Այսօր`   Չորեքշաբթի, 07 դեկտեմբերի, 2022 թ.

«Երևանը պետք է ետ կանչի ռուսական հրամանատարությամբ գործող ՀՀ հումանիտար առաքելությունը Հալեպից». Արման Բաբաջանյան

369
Երեքշաբթի, 04 հոկտեմբերի, 2022 թ., 22:18
«Երևանը պետք է ետ կանչի ռուսական հրամանատարությամբ գործող ՀՀ հումանիտար առաքելությունը Հալեպից». Արման Բաբաջանյան

ՀՀ ԱԺ նախկին պատգամավոր Արման Բաբաջանյանը ֆեյսբուքյան իր էջում գրում է. «2019թ. այդ օրերի պաշտպանական գերատեսչության ապիկար ղեկավարության հորդորով, ելնելով Հայաստանի և Արցախի անվտանգության նկատառումներից, չնայած Արևմուտքի բացարձակ անհամաձայնությանը, Հայաստանը Սիրիայում ՌԴ հրամանատարության ներքո հումանիտար առաքելություն ուղարկեց այդ երկիր:

Ուկրաինական ճակատում անհաջողությունների պատճառով Ռուսաստանը, կարծես, դուրս է բերում իր զորքերը Սիրիայից:

Ի՞նչ է մտածում Հայաստանն այս առթիվ: Սիրիա զորք ուղարկելը, այդ օրերի պաշտպանության կարճամիտ նախարար Դավիթ Տոնոյանի համոզմամբ ավելացնելու էր Ռուսաստանի աջակցությունը Հայաստանին, էապես փոխելու էր մեր երկրի դիրքավորումը, ավելի դիմակայուն էր դարձնելու:

Հետագա դեպքերն ու իրադարձություններն այլ բան էին գուժում՝ արտաքին ռեգիոնալ խոշորամասշտաբ փոփոխությունների բերումով Հայաստանն արդեն կորցրել էր իր կարևորությունը Ռուսաստանի համար, դրա նշաններն ի հայտ եկան ապրիլյան պատերազմին, բայց Երևանը չէր հավատում, չէր ուզում հաշտվել այդ մտքի հետ:

Չնայած Վաշինգթոնից, Բրյուսելից ստացվող բազմաթիվ զգուշացումներին, Երևանը որոշեց հանուն հավելյան անվտանգային հովանոցի աշխարհի կողմից մերժված ռուսական հրամանատարության ներքո Սիրիա հումանիտար առաքելություն ուղարկել:

Արդյունքում, թեև ԱՄՆ նախագահ Թրամփի քաղաքականությունն էապես նվազեցրել էր այդ երկրի ներգրավվածությունը հետխորհրդային տարածաշրջանի բազմաթիվ խնդիրներում, այնուամենայնիվ, այս և շատ ուրիշ քայլեր, որոշումներ և հայտարարություններ ավելի նվազեցրին Արևմուտքի ներգրավվածությունը Ղարաբաղյան կարգավորման և հարավկովկասյան տարածաշրջանային հարափոփոխ գործընթացներում:

Հետևանքը 2020-ի ավերիչ պատերազմում Ռուսաստանի և Թուրքիայի համատեղ առնվազը երկու ծրագրի իրագործումն էր՝ Արցախի նվաճումը պատերազմով և հայկական պետականության կազմաքանդումը:

Ո՛չ մեկը, ո՛չ մյուսը Ռուսաստանն ու Թուրքիա չեն կարողացել իրականություն դարձնել՝ տարածաշրջանի ուժային բալանսը վերականգելու Երևանի ձգտումների պատճառով:

Գալով Սիրիայում հայկական հումանիտար առաքելությանը: Հաշվի առնելով Երևանի և ԱՄՆ-ի խորացող հարաբերությունների հեռանկարայնությունը՝ Երևանն այս հարցում պետք է նախաձեռնողականություն հանդես բերի և ետ կանչի ռուսական հրամանատարությամբ գործող ՀՀ հումանիտար առաքելությունը սիրիական Հալեպից»:

Աղբյուրը`   Արման Բաբաջանյան