Երևան`   +28 °C
Այսօր`   Ուրբաթ, 19 օգոստոսի, 2022 թ.

Քաղաք, որը կառուցված է երկնաքարի բախումից առաջացած խառնարանում

394
Հինգշաբթի, 30 հունիսի, 2022 թ., 03:12
Քաղաք, որը կառուցված է երկնաքարի բախումից առաջացած խառնարանում

«Տիեզերք» ֆեյսբուքյան էջը գրել է. «Այս բնակավայրը տարբերվում է մոլորակի մնացած բնակավայրերի մեծ մասից:

Բայց ինչո՞վ, մի՞թե այդտեղ այլմոլորակայիններ են ապրում:

Ոոոոչ... ոոոոչ:

Խոսքը շուրջ 20.000 բնակչությամբ բավարական Նյորդլինգեն քաղաքի մասին է, որը կառուցվել է ոչ թե կամայական ինչ-որ վայրում, օրինակ՝ պատահական գետի ափին, այլ 14,5 միլիոն տարի առաջ երկնաքարային «հարձակման» արդյունքում առաջացած խառնարանի ներսում:

Ըստ մասնագետների, այդ խառնարանի «ճարտարապետ» երկնաքարն ունեցել է մեկ կիլոմետր տրամագիծ և Երկրի մթնոլորտ է «ներխուժել» 25 կիլոմետր/վայրկյան արագությամբ՝ առաջացնելով 26 կիլոմետր տրամագծով խառնարան:

Ի դեպ, ժամանակին տարածված է եղել այն վարկածը, որ քաղաքը կառուցված է ոչ թե երկնաքարային, այլ հրաբխային ծագման խառնարանի ներսում:

Սակայն այդ վարկածը «հօդս ցնդեց» 1960 թվականին, երբ երկու ամերիկացի գիտնականներ՝ Յուջին Շումեյքերը (նույն այն Շումեյքերը ում աճյունի մի մասն ուղարկվել է Լուսին) և Էդվարդ Չաոն, ուսումնասիրելով Նյորդլինգենի տաճարի պատերը, հայտնաբերեցին, որ դրանք պարունակում են շոկային քվարցի բյուրեղներ:

Այս բյուրեղներն առաջանում են բարձր ճնշման պայմաններում՝ երկնաքարերի հարվածների ժամանակ:

Ավելի ուշ խառնարանի պատերի հետագա ուսումնասիրությունները վերջնականապես հաստատեցին դրա ծագման երկնաքարային վարկածը:

Իսկ լուսանկարում Նյորդլինգենի կենտրոնական հատվածն է՝ նկարված թռչնի թռիչքի բարձրությունից»: