Երևան`   +16 °C
Այսօր`   Ուրբաթ, 29 մարտի, 2024 թ.

Ռուսաստանը դուրս է բերում զորքերը Սիրիայից, նրան կփոխարինի Իրանը. իսրայելական ԶԼՄ-ներ

876
Երկուշաբթի, 09 մայիսի, 2022 թ., 00:00
Ռուսաստանը դուրս է բերում զորքերը Սիրիայից, նրան կփոխարինի Իրանը. իսրայելական ԶԼՄ-ներ

Օրեր առաջ իսրայելական DEBKA պորտալը հայտնել էր, որ Ռուսաստանը դուրս է բերում իր ուժերը Սիրիայից՝ Ուկրաինա տեղափոխելու համար։ Այսպիսով, ռուսական հրամանատարությունն իր սիրիական զորախումբը կենտրոնացրել է մի քանի ավիաբազաներում՝ նախապատրաստվելով զորքերի մի մասի՝ Ուկրաինա տեղափոխմանը։ Դրանք են Խմեյմիմ, Դեյր էզ Զոր, Ղամիշլի և T4 ավիաբազաները։

Պորտալի ռազմական աղբյուրները նշում են, որ Ռուսաստանն Իսլամական հեղափոխության պահապանների կորպուսի և «Հեզբոլլահ»-ի իրանցի զինվորականներին է հանձնում այն ​​բազաները, որտեղ գտնվում էին իր ուժերը։ Հայտնի իսրայելցի լրագրող Էհուդ Յաարին հայտնել է, որ վերջին օրերին ռուսական բանակն ազատել է մի շարք հենակետեր, որոնք երկար տարիներ զբաղեցնում էր, հիմնականում Սիրիայի կենտրոնում և արևելքում, ինչպես նաև Հալեպի հյուսիսում, Դամասկոսի որոշ շրջաններում, Սիրիայի հարավում, որտեղ Իսրայելի հետ սահմանն է։

Ռուսական ներկայության կրճատումը մեծ նշանակություն ունի. Ռուսաստանը բազմիցս կանխել է իրանական դիրքերի ամրապնդումը, ստեղծել աշխարհազորայիններ, որոնք զերծ էին Իսլամական հեղափոխության պահապանների կորպուսի ազդեցությունից և թույլ չի տվել իրանամետ գեներալներին վերահսկողության տակ առնել սիրիական ամբողջ բանակը: Սակայն Ռուսաստանը կորցրել է Սիրիայում իրավիճակը վերահսկելու հետաքրքրությունը, և Դամասկոսի բարձր հրամանատարության վերջին նշանակումները հաստատում են դա: Նրանք բոլորը իրանամետ զինվորներ են Մահեր Ասադի 4-րդ դիվիզիայից, գրում է Details-ի իսրայելական հրատարակությունը։

Նշվում է, որ Սիրիայում ռուսական ռազմաբազաները շատ արագ զբաղեցվում են Իսլամական հեղափոխության պահապանների կորպուսի ենթակա ստորաբաժանումների կողմից։ Սա տագնապալի նորություն է Իսրայելի համար, որն Իսրայելի ռազմաօդային ուժերի բոլոր անհերքելի առավելություններով հանդերձ, չի կարող լիովին վերահսկել այն, ինչ կատարվում է Սիրիայում։ «Այսօր Հեզբոլլահն արդեն ունի մոտ 500 ճշգրիտ հրթիռ։ Սա շատ ավելի քիչ է, քան իրանցիները ցանկանում էին հասնել, բայց շատ ավելին է, քան Իսրայելը պատրաստ է դիմանալ»,- նշում է Յաարին։

Զուգահեռաբար հաղորդվում է, որ Սիրիայի նախագահ Բաշար ալ-Ասադը կիրակի օրը հանդիպել է Իրանի գերագույն առաջնորդ այաթոլլա Ալի Խամենեիի և նախագահ Իբրահիմ Ռաիսիի հետ։ Բանակցությունների նպատակների ու բովանդակության մասին մանրամասներ չեն հաղորդվել։ Ըստ ամենայնի, այցի պատճառներից մեկը ռուս զինվորականների փոփոխված ծրագրերի քննարկումն է, ենթադրում է իսրայելական հրատարակությունը։