ՆԱՏՕ-ն կանխատեսում է Ռուսաստանի մեծ հարձակում Դոնբասում

ՆԱՏՕ-ն մոտ ապագայում մեծ ճակատամարտ է ակնկալում Դոնբասի համար: Այս մասին հինգշաբթի՝ ապրիլի 7-ին, Բրյուսելում ՆԱՏՕ-ի արտգործնախարարների հանդիպման արդյունքներով հայտարարել է ՆԱՏՕ-ի գլխավոր քարտուղար Յենս Սթոլթենբերգը, փոխանցում է Deutsche Welle-ն։

Սթոլթենբերգը վստահ է, որ Ռուսաստանի կողմից Ուկրաինայի հյուսիսային շրջաններից զորքերի դուրսբերումը նահանջ չէ, այլ ուժերի վերախմբավորում՝ հետագա տեղափոխմամբ դեպի արևելք։ «Մենք ակնկալում ենք մեծ ճակատամարտ Դոնբասում, ռուսական մեծ հարձակում։ Եվ դա է պատճառը, որ ՆԱՏՕ-ի երկրներն այսօր մատնանշեցին Ուկրաինային մեծ աջակցություն ցուցաբերելու հրատապությունը»,- նշել է ՆԱՏՕ-ի գլխավոր քարտուղարը։

Նրա խոսքով՝ պատերազմն ավարտելու ամենահեշտ ճանապարհը կլինի այն, որ ՌԴ նախագահ Վլադիմիր Պուտինը որոշի զորքերը դուրս բերել Ուկրաինայից և լրջորեն մասնակցի բանակցություններին։ «Բայց մենք պետք է իրատես լինենք: Մենք նշաններ չենք տեսնում, որ նախագահ Պուտինը փոխել է Ուկրաինայի նկատմամբ վերահսկողության իր առաջնային նպատակը»,- հավելել է Սթոլթենբերգը։