ՌԴ ԶՈՒ-ն հրթիռակոծել է Մարիուպոլի ծննդատունը. վիրավորների թվում կան ծննդկաններ

Ուկրաինայի Մարիուպոլ քաղաքի ծննդատանը հասցված ավիահարվածի արդյունքում, որն իրականացրել են ռուսական զորքերը, տուժել է 17 մարդ։ Այս մասին UAraz-ի եթերում ասել է Դոնեցկի ռազմաքաղաքացիական վարչակազմի ղեկավար Պավել Կիրիլենկոն։

«Այս պահին Մարիուպոլի թիվ 2 ծննդատանն ավիահարվածի հետևանքով վիրավորների թիվը կազմում է 17 մարդ, վիրավորվել են բուժանձնակազմի անդամներ և ծննդկաններ, զոհեր չկան»,- ասաց նա։

Նա պարզաբանել է, որ օդային հարվածն իրականացվել է հենց Ռուսաստանի կողմից իսկ հայտարարված և հաստատված «լռության ռեժիմի» ժամանակ:

Հաղորդվում է նաև, որ չորեքշաբթի օրը Մարիուպոլի վրա ռուսական ինքնաթիռի ավիահարվածի արդյունքում ոչնչացվել են ինչպես ծննդատունն, այնպես էլ հիվանդանոցի մանկական և թերապևտիկ բաժանմունքները։ Հարվածի վայրում արկից ավելի քան 10 մետր տրամագծով փոս է մնացել։

Զելենսկին ռուսական ավիահարվածի փաստն անվանել է «վայրագություն»։