Ճապոնիան ևս պատժամիջոցներ կկիրառի ռուս պաշտոնյաների և Պուտինի դեմ

Ճապոնիայի վարչապետ Ֆումիո Կիսիդան հայտարարել է մի շարք ռուս պաշտոնյաների և ՌԴ նախագահ Վլադիմիր Պուտինի դեմ պատժամիջոցների սահմանման մասին, գրում է ՌԻԱ Նովոստին։ Կիշիդան նշել է, որ Ճապոնիայում Ռուսաստանի կառավարության առանձին անդամների բոլոր ակտիվները շուտով կսառեցվեն, եթե դրանք հայտնաբերվեն։ «Ռուսաստանի հետ հարաբերություններ պահպանելն անհնար է դառնում։ Ճապոնիան մտադիր է ավելի կոշտ պատժամիջոցներ կիրառել՝ համագործակցելով G7 երկրների և միջազգային հանրության հետ»,- հավելել է նա։

Ճապոնիայի վարչապետն ընդգծել է, որ երկիրը կաջակցի ռուսական որոշ բանկերի անջատմանը SWIFT միջազգային միջբանկային համակարգից։

Փետրվարի 25-ին հայտնի դարձավ, որ Ճապոնիան վիզային արգելք է սահմանել Ռուսաստանի որոշ քաղաքացիների համար և սառեցնում է անհատների ու կազմակերպությունների ակտիվները։ Բացի այդ, երկիրը պատժամիջոցներ է սահմանել Ռուսաստան այն ապրանքների արտահանման նկատմամբ, որոնք կարող են օգտագործվել ռազմական նպատակներով։