Կանադան, Ճապոնիան և Ավստրալիան պատժամիջոցներ են սահմանել Ռուսաստանի դեմ

Կանադայի, Ավստրալիայի, Ճապոնիայի իշխանությունները պատժամիջոցներ են սահմանել Ռուսաստանի դեմ՝ կապված Դոնեցկի և Լուգանսկի ճանաչման հետ։

Կանադայի վարչապետ Ջասթին Թրյուդոն հայտարարել է Ռուսաստանի դեմ տնտեսական պատժամիջոցների առաջին փաթեթի մասին, հայտնում է CTV-ն։ «Մենք արգելում ենք կանադացիների ցանկացած ֆինանսական փոխգործակցություն ԴԺՀ-ի և ԼԺՀ-ի հետ, մենք պատժամիջոցներ ենք սահմանում Պետդումայի այն պատգամավորների դեմ, ովքեր կողմ են քվեարկել ճանաչման մասին որոշմանը։ Մենք արգելում ենք կանադացիներին գործարքներ իրականացնել՝ կապված ռուսական պետպարտքի գնման հետ»,- հայտարարել է Թրյուդոն։

Ճապոնիայի վարչապետ Ֆումիո Կիսիդան Ռուսաստանին կոչ է արել Ուկրաինայի շուրջ ստեղծված իրավիճակը կարգավորել դիվանագիտական ճանապարհով: Նրա խոսքով՝ ԼԺՀ-ի և ԴԺՀ-ի ճանաչումը Ուկրաինայի ինքնիշխանության և տարածքային ամբողջականության խախտում է։ Նա հայտարարել է, որ պատժամիջոցները ներառում են Ճապոնիայում ռուսական պարտատոմսերի արգելք և որոշ անձանց ակտիվների սառեցում։

Ավստրալիայի վարչապետ Սքոթ Մորիսոնը նույնպես խոսել է Ռուսաստանի դեմ պատժամիջոցների մասին: «Նպատակաուղղված պատժամիջոցներ կկիրառվեն ութ ռուսաստանցիների նկատմամբ, որոնց կարգելվի մուտք գործել Ավստրալիա, ինչպես նաև՝ ավստրալական կառույցների և կազմակերպությունների հետ որևէ գործարք»,- ասել է նա: