«Խմբագրությունում դեռ չեն ըմբռնել, որ կոնկրետ այդ գործը դեռևս չի քննվել Հաագայի դատարանի կողմից». Գոռ Աբրահամյան

ՀՀ գլխավոր դատախազի խորհրդական Գոռ Աբրահամյանը ֆեյսբուքյան իր էջում գրել է. «Ամեն ինչում ինտրիգներ փնտրող և սեփական գոյությունը բացառապես փոքրիկ, հաճախ հնարված սենսացիաներով արդարացնող «Ժողովուրդ» թերթը ՀՀ դատախազության նկատմամբ իր չդադարող անհիմն թիրախավորումներն այս անգամ «զարդարել» է անտեղյակության և մասնագիտական գրագիտության պակասի հերթական «գլուխգործոցով»: Այսօրվա համարի առաջնորդող հոդվածով թերթը ՀՀ դատախազությանը և ՄԻԵԴ-ում Հայաստանի ներկայացուցչությանը մեղադրում է Ադրբեջանի դեմ՝ ռասսայական խտրականության բոլոր ձևերի բացառման միջազգային կոնվենցիայի խախտումների առնչությամբ Արդարադատության միջազգային դատարան ներկայացված գանգատի գործով Հայաստանի պարտվելու մեջ: Մեղադրանքի էությունն այն է, թե, իբր, Հայաստանն այդ գործով պարվտել է, քանի որ, մասնավորապես, դատախազությունն Ադրբեջանի հանցագործությունների բավարար ապացույցներ չէր տրամադրել:

Մի կողմ թողնենք այն փաստը, որ թերթը նման դատողություններ անում է՝ առանց գոնե մակերեսայնորեն տեղյակ լինելու, թե ինչ է տրամադրել դատախազությունը կամ ինչ չի տրամադրել:

Առավել էականն այն է, որ խմբագրությունում դեռ չեն ըմբռնել, որ կոնկրետ այդ գործը դեռևս չի քննվել Հաագայի դատարանի կողմից, հետևաբար չքննված գործով որևէ կողմ պարտվել կամ հաղթել չէր կարող:

Իսկ այն, ինչ քննվել է, ընդամենը այդ գանգատի շրջանակներում Ադրբեջանի նկատմամբ միջանկյալ միջոցներ կիրառելու վերաբերյալ հայցն է, որն իր մեծ մասով բավարարվել է՝ ի տարբերություն Ադրբեջանի կողմից Հայաստանի դեմ ներկայացված նմանատիպ հայցի, որով ներկայացված պահանջների մեծ մասը մերժվել է:

Հ. Գ. Ուղղակի զարմանալի է, թե ինչպիսի համառությամբ են հայաստանյան լրատվամիջոցները շարունակում «մամուլի տեսության» ձևաչափով տիրաժավորել լրագրողական նման մակերեսայնությունը»: