Պատգամավորը պնդում է՝ COVID-19-ի «օմիկրոն» շտամն արդեն Ռուսաստանում է. «Ռոսպոտրեբնադզորը» հերքում է

ՌԴ Դաշնային խորհրդի անդամ Վլադիմիր Կրուգլին հայտնել է, որ COVID-19-ի նոր՝ «օմիկրոն» շտամը, որը նախկինում հայտնաբերվել էր ՀԱՀ-ում և աֆրիկյան մի շարք այլ երկրներում, արդեն Ռուսաստանում է։
Խորհրդարանականի խոսքով՝ շտամի տարածման աղբյուրը կարող են լինել ռուս զբոսաշրջիկները, որոնք վերջերս են եղել Եգիպտոսում։ Այդ պատճառով նա կոչ է արել փակել Եգիպտոսի հետ չվերթները։

Սակայն «Ռոսպոտրեբնադզորի» համաճարակաբանության կենտրոնական գիտահետազոտական ​​ինստիտուտի գիտական ​​խմբի ղեկավար Կամիլ Խաֆիզովն ասել է, որ Ռուսաստանում «օմիկրոն» կորոնավիրուսի շտամը դեռ չի հայտնաբերվել։ Սա՝ կիրակի օրվա տվյալներով։

Ավելի վաղ Առողջապահության համաշխարհային կազմակերպությունը քննադատել էր աֆրիկյան երկրներից ժամանողների համար սահմանների փակումը, ինչը շատ պետություններ սկսեցին կիրառել նոր շտամի ի հայտ գալու պատճառով։ Հարավաֆրիկյան Հանրապետության իշխանություններն էլ, իրենց հերթին, նշել էին, որ անարդար են համարում համաշխարհային հանրության արձագանքը, որը հարավաֆրիկացի գիտնականներին երախտապարտ լինելու փոխարեն սկսել է սահմանափակումներ մտցնել այս երկրի հետ օդային հաղորդակցության ոլորտում։