Գերմանիան ու Լեհաստանը չեն կարողանում կարգավորել սահմանին ստեղծված իրավիճակը. ԳԴՀ ՆԳՆ

Լեհաստանի և Բելառուսի սահմանին իրադրությունը շարունակում է լարված մնալ. մի քանի հարյուր ներգաղթյալներ փորձում են ճեղքել արգելապատնեշները:

Գերմանիան ու Լեհաստանը չեն կարող միայնակ կարգավորել ստեղծված իրավիճակը, հարկավոր է ԵՄ-ի օգնությունը, այս մասին Bild-ին հայտնել է ԳԴՀ ՆԳՆ ղեկավարը: «Մենք պետք է օգնենք Լեհաստանի կառավարությանը՝ ապահովելու սահմանների անվտանգությունը: Իրականում դա Եվրոհանձնաժողովի աշխատանքն է»,- ասել է նա:

Ավելի վաղ պատմաբան Ռուբեն Շուխյանը ֆեյսբուքյան իր էջում անդրադառնալով ստեղված իրավիճակին՝ գրել էր. «Լեհ-բելառուսական սահմանին ծայրահեղ լարված իրավիճակ է ստեղծվել՝ Լուկաշենկոյի կողմից հրահրված դեպի Լեհաստան անօրինական միգրանտների հոսքի պատճառով. Լիտվան զորք է ուղարկել Բելառուսի հետ սահման, Վարշավան հայտարարել է Լեհաստանի տարածք ուժով ներխուժելու ամենազանգվածային օպերացիայի մասին: Համացանցում տարածված տեսանյութերում, որոնք նկարահանված են բելառուսական հատվածում, երևում է, թե ինչպես է մի քանի հարյուր մարդուց բաղկացած խումբը, այդ թվում՝ կանայք և երեխաներ, ճամպրուկներով քայլում ճանապարհով՝ դեպի Լեհաստանի սահման: Լեհաստանի իշխանությունները սահմանին տեղի ունեցող իրադարձությունների համար մեղադրում են Բելառուսի ռեժիմին. բելառուսական կողմը Մերձավոր Արևելքի ներգաղթյալներին հավաքագրում և տեղափոխում է իրենց երկիր, այնուհետև մաքսանենգ ճանապարհով ուղարկում է նրանց Լեհաստանի, Լիտվայի և Լատվիայի հետ սահման՝ Արևելյան Եվրոպայում միտումնավոր միգրացիոն մեծ ճգնաժամ հրահրելու նպատակով»: