««Դելտա» շտամն աչքի է ընկնում հիվանդացության ծանրության բարձր աստիճանով». Ա. Ավանեսյան

«Բոլորիս մտահոգում է, որ վարակը շրջանառության մեջ գտնվելով, մուտացվում է ու դա նկատելի էր ձմռանը՝ անգլիական շտամի դեպքում, այնուհետև Հնդկաստանում ի հայտ եկավ հնդկական «դելտա» շտամը: ՌԴ-ում, Վրաստանում արձանագրվել են «դելտա» շտամի դեպքեր: Մենք ընտրանքային հետազոտություններ ժամանակ առ ժամանակ իրականացնում ենք ու եթե հայտնաբերվի ՀՀ-ում, կներկայացնենք հանրությանը»,- ասուլիսի ժամանակ հայտարարեց Առողջապահության նախարարի պաշտոնակատար Անահիտ Ավանեսյանը՝ նշելով, որ կորոնավիրուսի «դելտա» շտամն աչքի է ընկնում տարածելիության բարձր ցուցանիշով ու հիվանդացության ծանրության բարձր աստիճանով:

Նա նաև նշեց, պատվաստումային գործընթացն ամբողջ աշխարհում չի ընթանում այնպիսի արագությամբ, որ հնարավոր լինի ստեղծել հանրային իմունիտետի շեմ և հնարավորություն չտալ վարակին անընդհատ մուտացվելու:

Նախարարի պաշտոնակատարը տեղեկացրեց, որ կարանտինը 6 ամսով կերկարաձգվի. նախագիծն ուղարկվել է Կառավարություն. մինչև սեպտեմբեր կներկայացվի նաև սահմանափակումների նոր փաթեթ:

Ըստ Անահիտ Ավանեսյանի՝ Հայաստանն աշնանը ձեռք կբերի Johnson & Johnson-ի արտադրած կորոնավիրուսի դեմ պատվաստանյութի 50 հազար դեղաչափ:
300 հազար դեղաչափ էլ Novavax-ի արտադրության պատվաստանյութ կներկրվի Հայաստան: