«Ինչո՞ւ է հականիկոլությունն ու հակասերժությունը նույն բանը». Հայկ Սահակյան
844
Չորեքշաբթի, 24 փետրվարի, 2021 թ., 00:55
«Քաղաքացու որոշում» կուսակցության անդամ Հայկ Սահակյանը ֆեյսբուքյան իր էջում գրել է. «Ինչո՞ւ է հականիկոլությունն ու հակասերժությունը նույն բանը: Պատկերացրեք 20-րդ դարի արտադրության Մոսկվիչ մակնիշի մեքենա ունեք, որն ինչ որ հրաշքով հասցրել եք մեր օրեր ու դեռ վարում եք: Շուրջ բոլորը հասկանում են, դուք էլ հետները, որ ձեր մեքենան բարոյապես, ֆիզիկապես մաշվել է, չի համապատասխանում մեր օրերի պահանջներին, դեռ մի բան էլ հարևանները 2020 թվի արտադրության BMW են վարում: Ի՞նչ եք անում դուք՝ որպես խնդրի լուծում, որոշում եք, որ վարորդն է մղավոր ու փոխում եք նրան. գալիս է նորը ու ձեր մեքենան տալիս պատեպատ, ավիրում, բայց միևնուն է՝ հարևանի BMW-ի կողքին կանգնեցնելու մեքենա չի դառնում, անհնար է ուղղակի, սպառվել է դրա մոդեռնիզացիայի, վերանորոգման, ծյունինգի բոլոր հնարավորությունները: Լուծումն ակնհայտ է, ձերբազատվում եք հին մեքենայից ու նորը գնում: Այս պարզ, պրիմիտիվ իրողությունը վաղուց հասկացել է մեր քաղաքացին, որ Նիկոլին փոխելով հարցը չի լուծվի, քանի որ Սերժին փոխելուց հետո գրեթե ոչինչ չփոխվեց՝ ասֆալտից բացի, բայց այ Նիկոլը սերժացավ: Հետևաբար համակարգն է պետք փոխել, ոչ թե վարորդին: Համակարգը կլանում է յուրաքանչյուր նորը, տարբերվողը, այլախոհը ու դարձնում սովորական՝ գորշ, մռայլ, մաշված, հնամենի: Քաղաքական համակարգը դեռ չի ընկալել այս պարզ իրողությունը, իսկ եթե հասկացել է ու այնուամենայնիվ Նիկոլի հաժարականից բացի այլ բան չի պահանջում և չի առաջարկում, ուրեմն պարզապես իշխանափոխության է ձգտում. պարզ, պրիմիտիվ աթոռակռիվ, ուր տեղ չունեն քաղաքացին, պետությունը՝ իրենց շահերով, խնդրներով, վաղվա օրով»:
