ԱՀԿ-ի փորձագետը կասկածում է, որ կորոնավիրուսն առաջացել է Ուհանի շուկայում

Բոլոր նախապայմանները կան ենթադրելու, որ COVID-19-ը տարածվել է Չինաստանի Ուհան քաղաքի ծովամթերքի շուկայում, սակայն դա չի նշանակում, որ վիրուսը ծագել է հենց այնտեղ, РИА Новости-ին հայտնել է ԱՀԿ խմբի փորձագետ Վլադիմիր Դեդկովը:

«Մենք եղել ենք շուկայում։ Ես շատ լավ ծանոթ չեմ Չինաստանի սանիտարական կանոններին, սակայն տեսնելով այն՝ կարող եմ ասել, որ շուկան շատ հեռու է կատարելությունից․․․ Փաստ չէ, որ վիրուսն այնտեղ է առաջացել, ոչ մի ապացույց չկա։ Գուցե այլ տեղում է վիրուսը հայտնվել, բայց տեսականորեն այնտեղ բոլոր պայմանները կան վիրուսի տարածման համար»,- պատմել է Դեդկովը։

Նա նշել է, որ շուկան այլևս այն վիճակում չէ, որում եղել է, այժմ այն փակ է, քանդվում է։ Սակայն կարելի է անել հետևյալ եզրակացությունը․ «Շուկան փոքր է, նեղ․․․ բնական է, որ այնտեղ ամեն ինչ կարող էր տեղի ունենալ։ Վարակի տարածման բոլոր պայմանները կան, երբ սանիտարական նորմերը չեն պահպանվում»,- ընդգծել է փորձագետը։

Ներկայում Չինաստանում է գտնվում ԱՀԿ-ի փորձագետների միջազգային խումբը, որն զբաղվում է COVID-19-ի ծագման պարզաբանմամբ: